BY DYLAN NARE
COMMUNITY REPORTER
Inhlanganiso ye United Members Society (UMS) isiyethule injongo yokuphathisana ndawonye labahlali be Ward 19 ikhangele ikakhulu ukusizana ngokuphosela imali kulabo abangabe behlelwe ngumkhuhlane loba ukufa elizweni le South Africa.
IUMS lilunga elisungulwe nyakenye (2021) ngamadoda lamakhosikazi athile adabuka esigabeni sikaWard 19.
Lokhu bakwenza ngemva kokuba inengi elikwele South Africa elaseZimbabwe lihlaselwe ngumkhuhlane wobhubhane abanye begwazwa njalo bedutshulwa lokhu osekuthwalise nzima abanye babo ukuzobeka labo asebethe babhubha.
Ngemva kokucubungula lezo zehlakalo bavula iqembu kuWhatssApp ukuthi baxoxisane ukuthi bangasizana kanjani.
Isikhulumeli seUMS umnumzana Edington Kopotshani ekhuluma lentatheli zindaba yeNtepe-Manama FM uthe:
“Ngemva kokubonisana labanye abagoqela uLawrence Dube,Learnmore Mafu, Maxwell Ndlovu,Thembelani Nyathi, Talent Ndebele kanye lo Precious Tlou kanye nabalandeli baleliqembu savumelana ukuthi sivule i account lapho esiyabe siphosela khona imali ngenyanga engaba likhulu elilodwa(R100).
“Lezi zimali ngezokuphathisa loba ngubani oseyehlelwe yinkinga. Imali le ilakho ukusebenza ukuthwala umufi imletha ekhaya kumbe ukuhambisa isigulane esibhedlela”.
UKopotshani uthe lokhu kuyancedisa kakhulu lekuhambiseni imbiko ngokuphangisa nxa sekuthe kwabalomonakalo kubantwana basekhaya abaseSouth Afrika.
“I UMS ayikhethi muntu ofuna ukuphathisana ndawonye lathi nxa siselizweni le South Africa. Siyakhuthaza bonke abangaphansi kwenduna uMathe ukuthi sibambaneni ukuze singabilobunzima masihlangana lokufa” kugcizelea uKopotshani.
Inkokheli yesigaba umnumzana Jokia Ranthasi uncome umsebenzi omuhle oqhutshwa yi UMS.
“Selokhu baqala lumsebenzi abantwana bethu, ubunzima sebuphunguka ekuletheni izidumbu zabantwana bethu abafela eGoli.
“Kuhle kakhulu ngoba abantwana abanengi abakuleli abala ama funeral cover e Goli”, kutsho uRanthasi.
NMCR#2022
