23 Mpandula 2024
Ngu Milton Mashasha
Zihlanganisa imbono, imicabango, amandla okusebenza kanye lezandla ezelulekileyo ezake zabayizifundi esikolo seNtalalale Scondary School lapho ezibumbe khona inhlanganiso zokuphathisa kwezentuthuko ezinjengeSediba SaThuso kanye leTswaranang BaBirwa lapho zibambane lezakhamizi kanye lenkokheli zomdabu bencedisana ukugudula lesisikolo ikakhulu kuzindlu zokufundela phakathi phansi ebesekugugudekile lokudabuka okuthize kungenxa yeminyaka ngoba nanko sayakhwa ngo1984 ilizwe lisanda kuthatha uzibuse.
Umsakazo kazulu uxhumane lonkosikazi Agnes Mathe umgcinisihlalo we School Development Committee (SDC) ohlala eNtalale koChibi ngaphansi kukamphathisigaba uJames Sebata ubike ukuba bayenza umsebenzi omuhle abantwana.
“Ngithanda ukubonga uMphathisikolo uNkosikazi Sipiwe Moyo, abazali izakhamizi kanye labakhokheli bezomdabu, ngibonga kakhulu abantwana ababuye lohlelo oluhle kangaka bencedisana lezakhamizi laba phathi bezigaba ukulungisisa isikolo sethu iNtalale High okuyintuthuko ejabulisayo kakhulu esigabeni.
“Abantwana laba bafunda lapha basuka ngemva kokuqeda izifundo zabo baya endaweni ezitshiyeneyo, sebehlangene njalo babumba inhlanganiso zabo zokuphathisa ikakhulu ezikolo lapho abaqala khona ngeSediba SaThuso Trust kwalandela iTswaranang BaBirwa kulapho okwazalwa khona loluhlelo lokugudula isikolo sethu ikakhulu phakathi phansi ezindlini zokufundela(floors).
“Ukubambana kwabo kuyabukeka njalo kuyajabulisa sikhangele lomsebenzi lowu abawuyenzayo, sibonga labazali lezakhamizi ngokuphatheka kuleyi ntuthuko yokuphakamisa isimo sesikolo sethu.
“Mina njengomgcinisihlalo weSchool Development Committee (SDC) ngilokujabula lokuthokoza kakhulu ngoba ngumthwalo wami ukubona isimo sesikolo sikahle yikho abantwana laba bayenze umsebenzi wami wabalula, “kutsho uNkosikazi Mathe.
Ekhuluma lomsakazo kazulu uMphathisigaba sakoChibi lapho okulalesisikolo ubike ukuba babonga uMphathisikolo uNkosikazi Sipiwe Moyo ngalowumsebenzi, abantwana abafunda kulesisikolo ababumbe lezinhlanganiso eziphathise ukugudula isikolo oSediba SaThuso Trust leTswaranang BaBirwa kanye lezakhamizi.
“Ngibonga abantwana abafunda kulesisikolo abaphenduke esigabeni lalowu mbono omuhle wentuthuko sikhangelane lokugudula isikolo sethu ikakhulu phakathi phansi ezindlini zokufundela.
“Ngithanda ukubonga njalo abaphathi bezigaba, uBekithemba Sibanda loPhethang Sibanda abeNedricky Industries akubangabantwana abaphuma kulesisikolo abaphathise ngenqola zabo zomlilo ukuthwala izinto zokusebenzisa, ukuncendisa ukulungisa ezinye izindlu zokufundela ezimbili phansi phakathi kanye lokuncendisa ngabakhi bakhe, kanye loQoqani Ndlovu omunye owafunda lapha njalo ngomunye othungamela loluhlelo ngokuqoqa lokubona ukuthi uhlelo luyaphumelela ngoba nanku utholakala ekhona mihla ngemihla lapha esikolo.
“Ngithi kulababantwana abaqeda izifundo zabo lapha bayosebenza endaweni ezitshiyeneyo elizweni kanye laphetsheya sebekhumbulekhaya ngokwelula isandla esincedisayo, qhubekani ngentuthuko enhle leyi eliyenzayo lingabuyeli emuva, ” kubika uMnu Sebata.
Umsakazo kazulu uxoxe loQoqani Ndlovu esesikolo beqhuba lowo msebenzi ubike ukuba njengezakhamizi labazali babone kufanele ukuthi bafake izandla bagudule isikolo sabo.
” Njengabazali, izakhamizi labanye bethu esafunda kulesisikolo sibone kuqakathekile ukuthi sigudule isikolo sethu ikakhulu phakathi phansi ezindlini zokufundela ukuze abantwana bafunde kahle ngoba nanko phansi ezindlini zokufundela besekusesimeni esingasihle, yikho sithe njengabazali selule izandla siphathise ukuthuthukisa isikolo sethu.
“Ngithanda ukubonga iNedicky Industries kanye labanye bethu abafake izandla beletha izamende, imali lokuphathisa ngokusebenza lokunye ngithi phambili ngentuthuko, isikolo sakhiwa ngabanikazi baso njengelizwe lakhiwa ngabanikazi balo.
“Ngithanda ukubonga njalo abakhi abasincendisayo lapha lawo wonke umuntu ngisithi uyacomeka umsebenzi esiwuyenzayo, phambili ngentuthuko, “kutsho uMnu Qoqani Ndlovu.
UShadreck Mabanga omunye owafunda kulesisikolo ongomunye wabasungula lezinhlanganiso zeSediba SaThuso ubike ukuba bahlanganisa amakhanda ukuze baphume laloluhlelo.
” Umbono wokugudula lesisikolo wavela ngemva kokwenza umcimbi wokunikenza abantwana balesisikolo imivuzo njengenhlanganiso yeSediba SaThuso kulapho esabona khona ukuthi ngempela sifuna ukugudulwa isikolo ikakhulu phakathi phansi ezindlini zokufundela.
“Saqoqa izimali njengabantwana abafunda kulesisikolo sathi ncono sinikeze usizo lapho esavela khona siphathisana lomunye wethu oweNedicky Industries.
“Singathaba kakhulu nxa singathola abangasixasa kulowumsebenzi ngoba lesisikolo sayakhwa kudala ngo1984 njalo samkela abantwana abanengi abavela endaweni ezinengi kakhulu, yilo ilifa lethu, sifuna sibe yisikolo esiphezulu esilohlonzi ngefundo kanye lesimo.
“Isifiso sethu singaqeda ukulungisa izindlu zokufundela besifuna ukugudula lendlu elamahofisi(Admistration Block) ngoba layo isimo sayo asisabukeki.”, kubika uMnu Mabanga.
“UHilary Ncube ongomunye okhokhela loluhlelo ekoBulawayo owafunda kulesisikolo uthe sakunanzelela ngomnyaka ka2021 ukuthi isikolo sifuna ukugudulwa.
“Besinikeza imivuzo kubantwana abaphumelelayo ngo2021 kulapho esabona khona ukuthi kufuna ukulungisiswa phakathi ezindlini zokufundelwa, silenhlanganiso yeSediba SaThuso Trust eyinhlanganiso ephathisayo ezikolo ngambabhuku lokunye sabambana leTswaranang BaBirwa kanye leNedicky Industries saqala ukwenza lowu msebenzi ngokunikela izinto ezidingakalayo ukwenza lowu msebenzi njengabantwana abafunde kulesisikolo njalo abakuleyondawo”, kutsho UMnu Ncube. @ lesego.𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemanama@gmail.com.
Click the link below to join our WhatsApp Groups.
Come Advertise With Us.
