31 Mfumfu 2024
Ngu Liberty Mutamba
Induna yase Dibilashaba uMarupi ekhothame ngeviki ephelileyo isifihliwe emzini wayo koMbuzimbili kwele Gwanda South.
Induna yakhothamela eHarare esibhedlela se Healthpoint ngemva kokugula isikhathi esifitshane. Induna, izakhamizi lezisebeni zika Hulumende zisukumele phezulu zizofihla induna
Ngo 8:30am ekuseni abantu besebethe gwaqa emzini wenduna bezoyivalelisa.
Izitolo leminye imisebenzi esigabeni ibimile kuhlonitshwa ukufihlwa kwenduna.
UMinister we Local Government and Public Works uHon Daniel Garwe obemelelwe ngu Senator we Chief’s council wakulu mhlubulo Induna uTshitaudze (David Mbedzi) uthe Induna uMarupi bekuyi Nduna elandela isiko njalo ithuthukisa isigaba.
“Silahlekelwe yiNkosi ebilandela isiko lakulindawo, UMarupi beyindoda esakhulayo etshengisa ukuba isiko lakulindawo uyalihlonipha njalo uyaligcina. Ugqugquzele kakhulu ukugejwa kwezikotsho okutshengisa ukuthi befuna isigaba se Dibilashaba sithuthuke”, kutsho uHon Garwe.
Izikhulumi ezinengi zincome ubukhokheli buka Marupi. UMinister of State for Provincial Affairs and Devolution wakulu mango uthe Induna uMarupi ibiyindoda yamasiko.
“UMarupi wangena esihlalweni esasemncane kodwa ubesebenza ngokuzikhandla. Ubehlala exhaswe zinduna zakithi njalo ubefundiseka njalo elalela izixwayiso. Ubesincedisa kakhulu kunhlelo zika Hulumende. Umbuso wakhe ubuncomeka sikhala lemuli. Sithi lala ngokuthula Nkosi yethu sizahlala sikukhumbula”.
Umongameli wezinduna uMtshane Khumalo uxwayise imuli yako Marupi ukuba bengalweli isihlalo sobukhosi.
“Uma Induna isikhotheme kanje kuvame ukudonselwana ukuba ngubani ozathatha isihlalo, Silethemba ukuba abako Marupi bazadinga induna yabo kungela nkulumo ezinengi. Umthetho unika umdeni umnyaka owodwa ukuba bazile ngemva kwalokho sebenga khetha induna. Kukanti kungahlala iminyaka emibili kungela muntu okhethiweyo uHulumende uyalikhethela umuntu ozathatha leso sihlalo,” kutsho uKhumalo.
Induna itshiye unkosikazi wayo uRorisang Tlou.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
