09 Lwezi 2024
Ngu Collin Sibanda
Gwanda South-Izakhamizi zeNtepe kanye labosomabhizimusi bakuleyo ndawo bahlangane ndawonye behlanza indawo yamabhizimusi eNtepe ukuze kuvikelwe ukumemetheka kwemikhuhlane engabangelwa yingcekeza.
Lokhu kuze kulandelwa isimemezelo esenziwa yinhlanganiso yezakhamizi eye Ntepe Residents Association.
UMillion Ndlovu oyisakhamuzi sakuleyo ndawo uthe kuqakathekile ukuthi amabhizimisi aqhutshelwe endaweni ezihlanzekileyo.
“Kuhle ukuthi sibambane, sigezise indawo yethu izulu lingakaqalisi ukuna ngoba ingcekeza yonke le isingasiphathela imikhuhlane enjenge sihudo phakathi kwethu. Ingcekeza inganda ayitshengisi kuhle ubuntu bethu. Akumelanga sivume ukuhlala engcekezeni enjengale. Ngabe kuyavuma, umuntu wonke bekumele azethese umlandu wokugcina indawo zethu esihlala kuzo zihlanzekile. Sengitsho lalo iganga ngokwalo, singalingcolisi,” kusitho umnunzana Ndlovu.
Uveze ukukhathazeka ngamaphepha asegcwele indawo yonke ngenxa yokulahlwa kwezibi mahlayana nje.
“Silobunzima sibhekane lamaphepha lama bhodlela lawa angaboliyo. Asegcwele umango wonke kube kanti akula mzamo wokuwasusa.”
Okhulume emele iNtepe Residents Association, utshalimana uArabiloe Mathe uthe ukuhlanzeka kufanele kube yinto yansukuzonke.
“Sikhuthaza ukuthi abantu bangameleli ilanga eliyabe liqanjiwe, kodwa bahlale belungisa indawo zabo ukuze zigcinakale zihlanzekile. Ingcekeza yinto embi engabisela umphakathi imikhuhlane, lezifuyo ziyadla amaphepha, ezinye zicine zigula zife,” kusitsho umnunzana Mathe.
Omunye wabo mama ophatheke kulolu hlelo ukhuthaze izakhamizi ukuthi ziqhubekele phambili zinanza ukuhlanzeka.
“Izakhamizi kaziqhubeke zibambene, zilwisane lengcekeza, ikakhulu phakathi kwendawo zokusebenzela ezinjengama vinkili, izikolo, indawo zokukhonzela, emfuleni lakwezinye indawo eziqakathekileyo. Ngiyabonga kakhulu wonke umuntu oze lapha ukuze siphathisane ngomsebenzi lowu. Asihlaleni endaweni ezihlanzekileyo ngasonke isikhathi.”
Izakhamizi beziphiwa izivikelo zokugqoka ezandleni (gloves) kanye lamasaka okuphosela izibi. Zibuye zakhuthazwa njalo ukungatshiseli izibi lezi indawo yonke lokhu kusenzelwa ukuthi kungabulali uhlonzi lomhlabathi ngokwawo. Izibi zidingelwe indawo eyodwa yokutshiselwa.
Ngenyanga Ka Mpalakazi ngomnyaka ka2018 uMongameli welizwe leZimbabwe wakubeka kwabasemthethweni ukuba usuku lwangolweSihlanu wakuqala wenyanga zonke kusukela ekuseni ngesikhathi sika8 kusiya 10 ekuseni abantu kumele bahlanze indawo zabo elizweni lonke jikelele.
