04 Mpalakazi 2024
Ngu Mpokiseng Sibanda
Kube lenjabulo enkulu esikolo seDombo Primary School lapho okuqhutshwe umbuthano wokunanza abantwana abaqhube kuhle (Speech and Prize giving day) kusigaba sokugqiba umnyaka okuyindlela yokukhuthaza abantwana ukuthi bazimisele zikhathi zonke.
Abazali basukumele phezulu ukuzothakazelela ilanga leli ndawonye labantwana kanye lobukhokheli besikolo ngemva kokunxuswa yisikolo. Umdlalo ubujonge ukupha abantwana abenze kuhle ezifundweni kusukela kuzinga le Early Child Development (ECD) A kuze kufike kusigaba sesikhombisa (Grade 7).
Umphathisikolo uTsepiso Kulube uthe njengesikolo bayaqakathekisa ilanga le Speech and Prize ngoba kuletha inqobe kubafundi ukuthi benze kuhle.
“Bazali njengeDombo Primary School sikhangelele ukuthi wonke umntwana oyenze kuhle kuzifundo zokugqiba umnyaka athole isipho njalo izipho lezi zizatholwa ngokwehlukana. Ukuphiwa kwezipho lezi kugoqela ukupasa, ukuhlanzeka,ukubala isilungu,ukubhala inombolo ngekilasi laphandle emidlalweni yebhola, ukugijima lokuthumeka komntwana,” kusitsho umphathisikolo Kulube.
Isikolo silabantwana phose amakhulu amathathu, njalo kuqakathekile ukuthi abantwana abenze kuhle banikezwe imivunzo.
“Isikolo sethu silabafundi abangamakhulu amabili lamatshumi ayisitshiyagalo mbili (280) lababalisi abalitshumi abesilisa abane labesifazane abayisithupha kukanti injongo yomdlalo yikulungiselela ikusasa labantwana.Okunye esikukhangeleleyo yikusebenza ndawonye ukuze sikhuphuke kumiklomelo ebikhona nyakenye oka 17% siye ku25-30% owesigaba sesikhombisa sabafundi (Grade7).”
Umphathi utshayele ihlombe uzulu ngokuzikhandla kanye lenkokheli ezibona ngenqubekela phambili yesikolo ekuthuthukiseni inhlelo zesikolo.
“Ngibonga ukusebenza ndawonye lobukhokheli besigaba bencedisa isikolo kanye lezihlobo labangane abaphetsheya eGoli abasixhasa okwamagama ngingengayo imilomo yezinkulungwane yokubonga.”
Ongutshalimani wesikolo uOnias Ndlovu uchaze ngokusebenza kwabo njenge School Development Committee (SDC).
“Ngokubhadalwa kwezimali zesikolo kusenze senelisa ukuthenga izisetshenziswa zesikolo ezigoqela iPrinter, amalaptop amathathu kanye lesakhiwo sokufuyela inkukhu ukuze senelise ukuncediseka kwezinye inhlelo kukanti ukuthengwa kwezisetshenziswa kusifake ezingeni lokuphumuza izikolo ezingomakhelwane ukuzihlupha ngokuhlala sicele uncedo kibo manje kathesi sesisenelisa ukuzenzela njengesikolo,” kusitsho umnu Ndlovu.
Uqhubeke esithi kabenelisi ukuqhuba izinhlelo zonke zeskilo ngemfanelo ngenxa yokusilela kwemali.
“Ngokusilela kwezimali besikhangelele ukuthi senelise ukusinda phansi ezindlini zokufundela ngoba ezinye sezigebhekile, sibuye siyakhe umthunzi wamabhasikili uphele lokunye okusalelayo kodwa silethemba lokuthi ngomnyaka ozayo kuzaphumelela.
“Sinanzelele ukuthi abazali abasileleyo ukubhadala benzwe yisimo sesomiso sendlala njalo sicela usizo lwezandla ezilula ezithile ukuthi zisincedise lendlebe zokusizwela ngokuphathisana lathi kuzidingo zesikolo okunjengamajojo ukuze isivande sethu sithuthuke ngokuthola amanzi eduzane,” kusitsho umnu Ndlovu.
Ongukhansila kulowomango uEmmanuel Makhabane Ndlovu ubonge abazali bonke ngokuphathisana lokusebenza ndawonye lababalisi ukuze kube lempumela yentuthuko.
“Ngithanda ukulibonga lonke ngokusebenza ndawonye njengabazali lobukhokheli libambisana liphathisana emisebenzini yesikolo njengokubaliswa kwayo nguMphathi lotshalimani wesikolo ngisithi qhubekani linjalo ukuze kube lempumela zentuthuko esigabeni sethu,” kusitsho uNdlovu.
Ongusabhuku uEdina Ndlovu ungcome kakhulu ubuhle obenziwa esikolweni.
“Okuhle kuyabukwa kanye lethemba likhona elokuthi ngomnyaka ozayo kuzakuba kuhle ukudlula lesisilinganiso ebantwaneni kanye lebazalini ngokusebenza okulamandla,” kusitsho unkosazana Ndlovu.
> 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemanama@gmail.com.
Follow the Ntepe-Manama Community Radio 97.0 Group on WhatsApp: https://chat.whatsapp.com/FM9CMb7F1K83o8KDR5Z0LX
Come Advertise With Us.
