20 Mbimbitho 2025
Ngu Liberty Mutamba
Abatsha emangweni we Gungwe (ward12) sebenikezwe inhlanzi ezingu 4 000 ezizabancedisa ukuba bathuthuke njalo baziphucule.
Inhlanzi lezi zibuya ngemva kokwakhiwa kwe damu leGungwe, njalo zingaphansi kohlelo lukaMongameli (Presidential Fisheries Scheme), oluhlose ukuthuthukisa ontanga.
Inhlanzi zomhlobo wama Bream lezikwaya zifakwe edamu leli emalangeni ambalwa adlulileyo njalo zikhangelelwe ukuthi zikhule zicacade ezinye inhlanzi ezizafika ku 15 000.
Okhangele ugatsha lwabatsha eZansi yemaNdebeleni uMavhonani Muleya uthi ontanga kumele baluthathele phezulu loluhlelo.
“Inhlanzi lezi esizifaka edamu zizathuthukisa abasakhulayo eGungwe labanye abaduze lakumango. Indawo le, sikhangelele ukuthi ithuthuke, njalo iguquke uma inhlanzi sezikhulile. Inhlanzi lezi sifisa zibe yibhizimusi njalo abasakhulayo benelise ukuzimela. Lolu luhlelo luka Mongameli njalo luzophakamisa ontanga,” kubika uMuleya.
Ubukhokheli bakulowo mango buthi buzagcina uhlelo lolu njalo basebenze gadalala ukuze bathole inzuzo. Obemele induna uMathe (uKayiso Nyathi) ubikele umsakazo kazulu.
“Sithabela uhlelo lolu, ngoba luzothuthukisa abatsha kithi lapha. Idamu lethu leli selisilethela intuthuko. Sengi khuthaza abantu bakithi ukuthi bagcine uhlelo lolu bebone ukuba luyaphumelela njalo bethole inzuzo,” kubika uMathe.
Ukhansila uMnu Brian Nyathi laye uthi bazalondoloza uhlelo lolu ukuze luye phambili.
” Idamu lethu siyabona seliletha ingqubekela phambili. Nanko ke sesile nhlanzi lapha. Sizasebenza ngamandla ukuba ziyavikelwa njalo zithuthukise isigaba sethu. Sibonga uMP wethu loMongameli ngalolu hlelo. Sifisa luyephambili izigaba zithuthuke,” kubika uNyathi.
Ontanga balemilomo ezinkulungwane ngaloluhlelo omunye wabo ngu Precious Ncube:
“Siyajabula ukuba sesizathola umsebenzi lathi njengabo ntanga lapha emangweni wakithi.Lokhu kuzasinceda ukuthi senelise ukudlelana lezinye indawo kwezamabhizimusi,” kubika uNdlovu.
UValiant Ncube ubika ukuba sekuzaphungula ukuthathwa kwezidakamizwa kulowo mango.
“Abasakhulayo bathatha izidamizwa ngoba abala okokwenza loluhlelo luzabanika umsebenzi. Luqhakathekile kakhulu sifisa inhlanzi lezi zikhule kuhle,” kubika uNcube.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
