29 Nkwekwezi 2025
Ngu Jonah B Moyo
Uzabeqala nqa uMakhadzi ukuthi ahlangane labalandeli bakhe abadabuka eGwanda, kuluMgqibelo(31 Nkwekwezi 2025) ozayo.
UMkhadzi uzabenandisa ePhoenix Shisanyama, edolobheni le Gwanda. Indawo le, isizenzele udumo lokubiza abahlabeleli baphetsheya ababalisa u DJ Tira, Toss, Murumba Pitch, Aymos, Nkosazana Daughter, Blaq Diamond labanye.
Owahlabela uGhanama, Jealous Down uzabe etshaya lo Jah Signal, exhaswe ngu DJ Vic Gee, DJ Virus, DJ Skot Mangena, Rich Flavour, Kay One, lo DJ Keitho.
IShisanyama ithi ifuna ukugqiba inyanga yesintu uNkwekwezi ngomfutho yikho bebize uMakhadzi ophakamisa isiko lesiVhenda.
UEntertainment Manager weShisanyama uDj Keitho ukubeke mgceke ukuthi kuzabe kungabizwa ozwayo.
“UMakhadzi lo Jah Signal bazabe bekhona kulowu mcimbi kanye labo DJ basekhaya, ukuzojabulisa abalandeli babo. Asizenini ngobunengi sizojabulani libona uMakhadzi eligidela mathupha.
“Sikhangelele ukuthi lowu mcimbi uzakhanga abantu abasuka endaweni ezitshiyeneyo okugoqela koBulawayo, Kezi, Beitbridge le Zvishavane,” kutsho uKeitho.
“Sizayenza imizamo etshiyeneyo ukuthi abaculi bekhaya labo betshaye, andubana uMakhadzi ajabulise uzulu kuphawula,” uKeitho.
UMakhadzi uvame ukutshaya ngomvutho njalo etshaya kuzwele. Ungumhlabeleli oyenelisa ukuhlanganisa umgido lomculo lokhu sekumuyenze ukuthi acole izicoco ezitshiyeneyo.
