30 Nkwekwezi 2025
Ngu Princess Mahlangu
IChegato High inqobe kumncintiswano yokugijima obuqhutshwa eManama High kuliviki, imidlalo le ibihlanganisa izikolo ezilitshumi lasitshiyagalombili, ezingaphansi kwe bandla le Evangelical Lutheran Church in Zimbabwe (ELCZ).
Imidlalo le ihlala iqhutshwa yizikolo lezi ukuze bemanyane, njalo belolonge iziphiwo zabantwana kwezemidlalo .
Umphathisikolo we Manama High uMnumzana Khauhelo Mlea uthe imidlalo inikeza abantwana ithuba lokulolonga iziphiwo zabo njalo utshayele ibandla le Lutheran ngokuhlala iqhuba imidlalo le. Lokhu kwenza abantwana bekhule belomfutho wokuziphakamisa, njalo betshiyane lezidakamizwa.
“Abantwana batshengise ukuba baledlabuzane lokulolonga iziphiwo zabo, ngokunjalo imncintiswano le ibanika ithuba lokuba batshengise lezo ziphiwo. Sibonga ibandla leELCZ lengatsha eziphathise ukuze imidlalo le ibeyimpumela,” kubika uMlea.
Omele iGwanda South edale lephalamende njalo engumsekeli Ka Minister kwezokwethulwa lokusakazwa kwemibiko uDr Omphile Marupi uphawule ukuba lumncintiswano uletha ingqubekela phambili ebantwaneni njalo ubanika ithuba ukuthi babonise iziphiwo zabo.
“Kuyajabulisa ukubona ibandla leLutheran liqhuba imidlalo le, lokhu kukhuthaza abafundi ukuthi iziphiwo zabo zibalulekile njalo bengazithatheli phansi.
Sesibone abantwana abanengi betshengisa iziphiwo zabo kunkundla ezitshiyeneyo, konke kuqala phansi. Ngilinika ingqobe ukuthi liphakamise iziphiwo zenu njalo lizithuthukise” Kubika uMarupi.
Uhulumumende uthi imidlalo le, iletha umoya wokubambana, ukuthi kube loBuntu njalo intsha ithuthuke kwezemidlalo. Lokhu kwenza lesizwe siphakame.
UMsekeli kaMongameli uKembo Mohadi obemelwe ngungqongqotshe okhangele ngentuthuko, lengqubekela phambili eZansi yemaNdebeleni uAlbert Nguluvhe uthe abantwana kumele baxhaswe ukuze bafeze iziphiwo zabo.
“Lokhu kutshengisa ukuthi ibandla leli lisekela icurriculum enikeza abantwana ithuba lokuthi basebenzise iziphiwo zabo ukuzithuthukisa. Ababalisi labafundi kumele bazwisise ukuba imidlalo ingenza ikusasa labo liqhakaze.
“Siyaziqhenya njengelizwe kwezemidlalo kulandela ukukhethwa kuka Kirsty Coventry ukuthi abenguMongameli we World Olympics Committee. Lokhu kumele kunike abantwana umfutho wokuba labo bazinikele kwezemidlalo. Ngaphandle kokuthi ezemidlalo zelula umzimba, zidlala indima enkulu ekuthuthukiseni ilizwe lethu,” kubika uMohadi
Okhangele ngezemfundo kuWestern Diocese uMeika Mlambo, owayengumphathi eManama High uT.J Muleya, amadikhoni, abafundisi, ingatsha zikahulumende bezibuyile ukuzobukela umncintiswano lo. Lonyaka umncintiswano ibiqhutshwa ngaphansi kwendikimba ethi, ‘Ukwezethemba lokucabanga ngendlela ejulileyo.’
Follow the Ntepe-Manama Community Radio 97.0 channel on WhatsApp: https://whatsapp.com/channel/0029Vab45XdKGGGD1NN4iL3S
𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
