17 Ntulikazi 2025
Ngu Pinky Moyo
GWANDA SOUTH -Abahlali baka Ward 13 lo 14 emangweni wase Ntepe abayakhele duze lomgwaqo bakhala ngothuli olwenziwa ngamatruck aya eMandihongola athwala iLithium.
Abahlali sebesengozini yokubanjwa yimikhuhlane ebangelwa luthuli enjenge TB.
Izifuyo kanye lezinanakazana zeganga izihlahla lotshani ezikudlayo sokulothuli lazo sezisengozini yokugula. Uthuli lolu njalo seludala ukuba izihlahla kanye lotshani kungakhuli kahle okuzenza ukuba silahlekelwe yimvelo yethu.
Ukhansila kaWard 13 uMnu Miclas Ndlovu uthe loludaba lufuna ukuphakanyelwa phezulu kungakamemetheki imikhuhlane kuzulu.
“Uthuli luyingozi kakhulu kuzulu ngakho kuzamele kuthunywe iqembu elithize liyexoxisana labanikazi bemgodi eMandihongola ukuze kube lesisombuluko ngokungenziwa ukuvikela uzulu,” kutsho uNdlovu
Omunye wabahlali oyakhele duze lomgwaqo unkosikazi Siwela Dube uthe bona uthuli sebetsheba ngalo bengasabali umsindo wamatruck ebusuku.
“Indawana yonke sokuluthuli kuphela ngitsho lasezindlini esilala khona. Eyomsindo yona angiyithinti sokuyinjayelo. Thina sesisengozini yokuphathwa ngumkhuhlane wofuba ngoba uthuli solusingenile kakhulu emzimbeni,” kutsho uMaDube.
Ongusobhuku endaweni yaseNtepe umnunzana Rendo Ndlovu uthe kumele kuthathwe inyathelo lakuqala masinyane elokunxusa abezempilakahle.
“Kuzamele kunxuswe abezempilakahle bazohlola abahlali umkhuhlane wofuba kusasemasinya njalo bathole imithi yokubavikela. Ngenjenkokheli sizabhala incwadi zisiya emahofisini aphezulu ukuze kutholakale usizo lokufaka ithara,” kutsho uNdlovu.
Uzulu uyakhuthazwa ukuthi agqoke ama mask njalo bazame ngamandla ukuthintitha uthuli endaweni abahlala kuzo ikakhulu indawo ezibalisa iNtepe, Nyambi, Sifanjani, Vela le Tshongwe.
