24 Ntulikazi 2025
Ngu Liberty Mutamba
Amapholisa eZansi yemaNdebeleni abophe amadoda amabili emngceleni we Beitbridge ensukwini ezedluleyo bengenisa imbanje ezilesisindo se 200kg. Imbanje lezo bebesuka lazo elizweni lakwele South Africa.
UBenjamin Mutezo (26) odabuka ko Bulawayo lo Jealousy Moyo (39) owe Beitbridge zibakhalele besesendleleni beqonda endlini eselokitshimi lema Yellow house eBeitbridge.
Isikhulumeli samapholisa seZansi yemaNdebeleni uInsp Chiratidzo Dube uqinisekisile ukuba amadoda la, sebotshiwe.
“Sibophe uMutezo lo Moyo ngemva kokutholakala belembanje ezilesisindo esingange 200kg. Amadoda la, abanjwe mhlaka 20 Ntulikazi emini ngemva kokuba amapholisa aphenya ngezidakamizwa athole udletshana lokuba kulemota yohlobo lwe Honda Fit ethwele imbanje lezi. Amapholisa enelisa ukubamba leyo mota ebilo mtshayeli (Moyo) lo Mutezo ehlezi phambili, baphenya bathola kulamasaka embanje.
“Amapholisa aqhubeka ayephenya endlini esema Yellow houses lapho amadoda la akade elubhekise khona bathola kulezinye imbanje kuleyo ndlu. Imbanje ezitholakale endlini lase moteni zile sisindo se 200kg.
“Ngemva kokuba amapholisa esebahlabe ngemibuzo uMutezo uthe imbanje lezi uzithenge kweleSouth ehlose ukuyazithengisa koBulawayo. UMoyo ubemncedisa ukuzithwala ayezigcina kumalumakhe ohlala ema Yellow houses,” kubika uInsp Dube.
Kumaviki ambalwa adlulileyo kubanjwe abanye eMakhado, Beitbridge belembanje ezilesisindo se 300kg.
Lokhu kuza ngemva kokuba uhulumende, lengatsha ezinengi ziqhuba imikhankaso yokuba izidakamizwa ziphele elizweni, nanko sezibulele intsha.
