30 Ntulikazi 2025
Ngu Jonah B Moyo
Amapholisa eZansi yemaNdebeleni asebophe abasolwa abayisithupha(6) ngemva kokuthi umphakathi ubone abasolwa ababili besethula amabhakede ageleza igazi kuHonda Fit elimhlophe befaka endlini esema New Stand eBeitbridge basebikela Amapholisa.
Amadoda ayisithupha(6) awe Beitbridge uKudakwashe Mabhanda(39), Tatenda Sungano(25), Savious Chiputso(48), James Chibaya(30), Simon Togara(50) lo Ezekiel Gwauya(43) zibakhalele mhlaka 26 Ntulikazi ngemva kokuthi kwenziwe uphenyo olwaveza ukuthi kulenkomo ezilitshumi lesificamunwembili (18) ezatshontshwa ngamadoda lawa kusukela ku nyanga ka Nhlolanja kuze kuthi Ntulikazi behlinzela inkomo zobusela eguswini.
Isikhulumeli samapholisa seZansi yemaNdebeleni uInspector Chiratidzo Dube uqinisekisile ukuba amadoda la, sebotshiwe.
“Mhlaka 26 Ntulikazi ekuseni amapholisa eBeitbridge balunywa indlebe ngumphakathi ngemva kokubona iHonda Fit elimhlophe lisethula amabhakede alenyama.
“ Ngokuphazima kwelihlo abomthetho basebefiki kustand 4871 New Medium Density Beitbridge lapho okuhlala khona abasolwa ababili uMabhanda lo Sungano.
“Bathola amadoda lawa elenyama egcwele amabhakede amabili, ibhavu yokuwatshela layo igcwele inyama lamabhavu amabili amancane elenyama kusendlini zamadoda lawa. Bathola njalo isikhwama esilehloka, ingqamu lencingo ezintathu zokuthiya, Lahle labatshonela emini amadoda lawa,” kubika uInsp Dube.
Amapholisa athe ephenya kabanzi abona esinye esigameko, okusolelwa ukuthi senzwa ngamadoda la.
“Amapholisa adingisisa athola ukuthi abasolwa batshontsha inkomo ezimbili ezimnyama ezitshiswe uT3 olama bars bazihlinzela emaguswini aseduze le Naude Quarry site. Abasolwa bebengasebenzi bodwa baliqembu. UChiputso lo Chibaya bahle babanjwa labo emaguswini aseduze leDump site.
“Kwasekutholakala amakhanda enkomo ezintathu, izikhumba, umtshiso lamacici alenombolo zikamakhalekhukhwini, sathinta umnikazi wenkomo wazivuma ukuthi ngezakhe inkomo ezihlinziweyo,” kubika isikhulumeli samapholisa uDube.
“Kusenzwa uphenyo kwatholakala amathambo amakhanda ezinkomo ezine lapho abasolwa abane(4) ababike ukuthi bahlinza inkomo lezi ngenyanga kaMbimbitho.
“Kwatholakala ikhanda lenkomo kwenye indawo kwaqhubekwa ngokudinga Kwasekutholakala amanye amathambo ekhanda lenkomo eyabulawa ngu UChiputso lo Chibaya ngenyanga kaNhlolanja.
“UChiputso, Chibaya lo Gwauya abasolwa laba babulala inkomo engumdaka(Brown), Amapholisa athola ikhanda lesikhumba senkomo. Kwenye indawo emaguswini kwatholakala icici lenkomo kwathi endaweni yokucina lapha abahamba khona lamapholisa kwatholakala amathambo amakhanda enkomo ayisithupha(6). Konke okwatholakalayo kwahanjiswa enkambeni yamapholisa eBeitbridge,” kutsho uInsp Dube.
Abasolwa sekulasikhathi eside behlinza inkomo zabantu emaguswini eBeitbridge. Umphakathi uxhwayiswa uphathisa Amapholisa ukuze kubanjwe amasela emphahla zabantu.
