06 Ncwabakazi 2025
Ngu Pinky Moyo
GARANYEMBA – Abahlali be Garanyemba bahlale phansi kanye lobukhokheli besigaba bahlanganisa amakhanda ngengcekeza abayibona isigcwele indawana yonke njalo iqhubeka imemetheka esigabeni se Garanyemba, ingacina ibalethela imikhuhlane etshiyetshiyeneyo.
Izakhamizi zikwenze lokhu zihlose ukuthuthukisa indawo yabo njalo kuyindlela yokuvikela imikhuhlane ebangelwa yingcekeza.
kuviki eliphelileyo, iqula lesigabeni seGaranyemba eligoqela obaba, omama kanye lentsha baphume ijumo bebhoda esigabeni endaweni ezibalisa ezitolo, esikolo lasemizini bedobha yonke ingcekeza betshisa kuthi amagabha angatshiyo bebewagebhela phansi.
Umnunzana Matthew Sibanda obephathekile laye emsebenzini lo ukhalaze ngokuthi omamanyana batshiya ama pamper abantwana egcekeni.
“Abantwabethu abasanda kuba labantwana bathi benga tshintsha ingcekeza yomntwana batshiye amapamper khonapho izinja zidonse zivule kube yingcekeza nje indawo yonke,”kutsho uSibanda.
Unkosikazi Zianai Maringa laye obexhasa umsebenzi lo uthi izigubhu zabontshenku yizo kakhulu ezingcolisa indawo.
“Okungamagabha kwabontshenku kugcwele indawo yonke hayi ezitolo kuphela kodwa emakhaya lezindleleni, ikanti bekungaba ngcono nxa kungaba le recycling abantu bathole inzuzo yemali ngokuwadobha,” kutsho uMaringa.
OnguSobhuku uMnumzana Mkhubo Ndlovu esigabeni se Garanyemba uthe uyajabula ngokubona abantu besukumela phezulu emsebenzini lowo.
“Kuyathokosiza lokhu njalo kunika igunya lokuhola abantu abayithandayo indawo yabo, benanzelela ingcekeza ekhona besilwa layo ukuze isigaba sivikeleke emikhuhlaneni ethile,”kutsho uNdlovu
Leliqula lithe liyanxusa abantu ukuba basondele babambisane emsebenzini lowu ukuze benelise ukunqoba ingcekeza futhi bazivikele emikhuhlaneni. Izulu nxa lisina kuyabe kugcwele ingcekeza igangeni yonke leyo ngcekeza iyageleza iya ezifuleni lapho abakha khona amanzi ngakho bebecela kube lama dust bin okufaka ingcekeza leyo.
