17 Ncwabakazi 2025
Ngu Milton Mashasha
Abalimi bePaswane Humbane Irrigation Scheme bayathokoza ngesivuno abasithola esivandeni sabo ngoba sebevuna besidla, bethengisa kanye lokuphathisa abaswelayo.
IPaswane Humbane Irrigation Scheme esemfuleni uTuli ilabalimi abasuka esigabeni seHumbane eBengo.
Abalimi laba balime umbhida(chomoliah), ikhabitshi,amatamatisi kanye lezithelo kanye lokunye. Loba bethokozela isivuno abalimi laba baswela indawo abangathengisela khona izilimo zabo(market).
Ekhuluma lomsakazo kazulu umphathisihlalo we Irrigation uNkosikazi Brilliance Sithole ubike ukuba balime izilimo ezinengi sibili njalo sezivuthiwe.
“Silima kuHumbane Irrigation kumfula uTuli singabahlali beHumbane eBengo.Silombhida, amatamatisi lezithelo okunengi sekuvuthiwe. Amatamatisi amanye sephelile amanye yikho evuthwa.Silomhlobo eminengi yembhida ikhabitshi, konke sekuvuthiwe. Siswela abathengi i(market) asilayo.Siyacela uzulu kabuye ukuzosifakela izandla sincedane.Silemihlobo yembida etshiyeneyo kodwa ikhabitshi yiyo enengi kakhulu,” kutsho uNkosikazi Sithole.
UMnumzana Luke Maphosa ongomunye wabalimi kuliIrrigation yePaswane Humbane uthi izilimo zabo zinhle njalo ziyabukeka.
“Izilimo zethu zinhle ziyakhwabitheka ikakhulu nxa sikhangela umbhida wohlobo lweKhabitshi muhle okumangalisayo njalo mnengi kakhulu.
“Siyakhuthaza abafuna isitshebo lalabo abalamabhizimusi amancane baze ukuzosifakela izandla,” kubika uMaphosa.
Umama uVirginia Masendeke ohlala esigabeni seHumbane eBengo uthi siyaphathisa ukupha abasweleyo kulokhu esikuthola kuIrrigation yePaswane Humbane.
“Lapha ePaswane Humbane Irrigation Scheme siyanceda abaswelayo ngokubanikenza okunye esikuthola kuzivuno zezilimo zethu.Kukanti siyadla okunye lemuli okunye sithengisa ukuze siphathise imuli ngehlawulo zesikolo lokunye.
“Sicela uzulu bazosifakela izandla ukuze sithuthukise isigaba sethu seHumbane eBengo ngaleyi irrigation,” kubika uNkosikazi Masendeke.
Umama uOvina Siziba omunye wabalimi uthi abafuna ukuthenga imbhida ngobunengi ababuye ku irrigation yabo.
“Sixwayisa abalamabhizimusi amancane ukuthi babuye basiphakamise labo beziphakamisa ngokusifakela izandla,” kutsho uNkosikazi Siziba.
UNkosikazi Nitrin Nyathi uthi silazo njalo izithelo kuIrrigation yePaswane Humbane.
“Silazo njalo izithelo lapha ayisikho ukuthi silima umbida lamathamathisi kuphela.
“Silamahorotshisi asevuthiwe lezinye ezithelo uzulu bengayi khatshana ukuyadinga izithelo ababuye lapha eduze ePaswane bazosifakela izandla bathenge izithelo,” kubika uNkosikazi Nyathi.
@ lesego.
