20 Ncwabakazi 2025
Ngu Liberty Mutamba
CORNERLINE– kudaba olutshwaqisa umzimba kulendoda yeCornerline ngaphansi kwenduna uNhlamba kwele Gwanda South egwaze inina ebihlalisana lalo ngesihluku, yaqeda yazihihithela ngentambo ephahleni lwaleyondlu.
Kubikwa kunyanga edlulileyo umuyi uNqobile Ncube (36) wehlukana lonkosikazi wakhe, ngesikhathi besehlukana umuyi ubeselabantwana ababili, yilapho ke aqale ukuvuselela ubudlelwano lentombi yakhe yakudala u Untibile Ndlovu (30).
Ilanga lapho iyezi elimnyama elavunguza khona kubikwa uNcube wacela ukuba abantwana bayelala komakhelwane. Yilapho uNcube agwaza uNdlovu ngendlela eyisihluku. Uthe esenze isigameko lesi wabhala incwadi laye wazi hihithela ngentambo kuleyo ndlu.
Ekuseni abantwana bazama ngendlela zonke ukuthi bangene endlini. Umphakathi wase sungula iqhinga lokuvula yilapho abathola uNcube ezibophele ephahleni lwendlu, uNdlovu ethe daca enzikini yegazi.
Isikhulumeli samapholisa seZansi yemaNdebeleni Insp Chiratidzo Dube ubike ukuba udaba olunjalo lusaphenywa ngamapholisa kabanzi.
“Amapholisa asadingisisa kabanzi udaba olwenzakale eCornerline lapho indoda ebulale inina, layo yazibophela. Sinanzele ukuba abantu ababhubhileyo ngu Nqobile Ncube lo Untibile Ndlovu. Isizatho sisaphenya.
“Sixwayisa uzulu ukuba engasebenzisi udlame ukuxazulula ingxabano. Ingakho selula indlebe zethu kubantu abalolwazi olujulileyo ngalesi sigameko,” kubika uSomlomo uAss Insp Dube.
Udaba lolu luza kumaviki ambalwa ngemva kokugwazwa kuka Zimiso Chikomo ezitolo ze Samlodi. UChikomo waqala watshaywa ngamatshe andubane bemgwaze. Amapholisa enelisa ukubamba abasolwa ngemva kwesigameko lesi.
