26 Ncwabakazi 2025
Ngu Milton Mashasha
ABALIMI– beMene Bolamba Irrigation ebambanisa uWard 11 kanye loWard 12 sebeqala ukulima ngemva kokubhekana lodubo lokuvaleka kwempompi ezihambisa amanzi esuka edamu isiya kuIrrigation yabo ngemva kokuna kwezulu elinengi nyakenye.
Lokhu kuza ngemva kokulungiswa kwalezimpompi ngomunye wabalimi wakule irrigation.
Ekhuluma lomsakazo kazulu uNkosikazi Nesia Sibanda ubike ukuba bayajabula ngokubuyela njalo e-irrigation.
“Sithanda ukubonga uMnumzana Patson Sithole omunye wabalimi balapha kuMene Bolamba Irrigation ophathise ngokusincedisa ukulungisa impompi ukuze sikwanise ukuthelela
Bebesebethwele nzima ngokuhlala bengasebenzi ngoba bajayele ukusebenza bethola imbhida, amathamathisi lokunye besidla kukanti okunye bethengisa bephathisa imuli ngehlawulo zesikolo lokunye.
“Sesilenyanga ezine sibuyele ku irrigation, ngoba kwaqala ukulungiswa ngoMbimbitho sazolima ekuqaleni kukaMabasa, kathesi silombhida sesisikha sisidla njalo omunye siyathengisa kukanti lamatamatisi sesidobha njalo sesahlanyela lomumbu,” kubika uNkosikazi Sibanda.
UNkosikazi Florance Mashasha uthi sebelima njalo ngemva kwesikhathi eside behlezi.
“Sesaphindela njalo ekulimeni ngemva kodubo lwempompi ezazivalwe ludaka. Sekwalunga sesilima yikho okwakathesi senelise ukulima umbhida, amatamatisi lomumbu,” kutsho uFlorance Mashasha.
UNkosikazi Velaphi Ndlovu ohlala koMene eNtalale kuWard 11 ubike ukuba bacela usizo lokutholiswa amanzi ahlanzekileyo.
“Silesicelo kule Irrigation inani lethu likumatshumi amahlanu lanthathu (53) kodwa silodubo lwamanzi okunatha ahlanzekileyo. Sinatha amanzi asuka edamu. Sicela ongasincedisa ukusigebhela umgodi wamanzi ukuze sithole amanzi okunatha ahlanzekileyo,” kubika uNkosikazi Ndlovu.
Omunye wabalimi uNkosikazi Gloria Ncube uthi babhekane lodubo lwamanzi.
“Siyasebenza ngamandla ukuze siziphilise lemuli zethu kodwa sihlangana lenkinga yamanzi. Indlela esiwathola ngayo abuya ngesiqubu esiphansi okokuthi asenelisi kuthelela ngendlela esifisa ngayo.
Irrigation yethu inkulu ngabe siyathola ongasigebhela umgodi wokuncedisa ukuthelela khonapha phakathi ukuze senelise ukuthelela ingadi yethu yonke,” kubika uNkosikazi Ncube.
UNkosikazi Fresh Siziba ohlala ePelele koMbirwane kuWard 12 uthi sesisidla umbhida okwakathesi.
“Silombhida yiwo esesiwudla kathesi kukanti imbambayilalomumbu sikhangele ukuvuna kunyanga ezimbili ezizayo kuMpandula loMfumfu.
“Silokujabula ngokuphenduka ukuzolima ngemva kwesikhathi sihlezi ngenxa yodubo kwempompi kodwa yonke into isikahle,” kutsho uNkosikazi Siziba.
Umama uSilibaziso Sibanda owakoMbirwane ePelele njalo uthi umumbu usesemncane okwakathesi.
“Njengabalimi abangelasikhathi eside siphindele ukulima besiqale ngezilimo eziphangisa ukuvuthwa okunje ngamathamatisi,umbhida lokunye.
“Sesafaka umumbu lembambayila njalo loba nje umumbu usesemncane kodwa kunyanga ezizayo siyabe sesivuna nxa kuhambe kuhle,” kubika uNkzn Sibanda
