27 Ncwabakazi 2025
Ngu Liberty Mutamba
Ugatsha lwe Environmental Management Agency (EMA) seluqale umkhankaso wokulimukisa uzulu ukuba avikele imvelo ukuba ingatshabalaliswa ngumlilo weganga.
Iganga livame ukutsha ngesikhathi sentwasa ingakho uzulu uyalimukiswa ukuba aqhaphele imvelo kumlilo we ganga.
Umnu Simon Musasiwa ofundisa uzulu ngeze mvelo kugatsha lwe EMA ubike ukuba kumele kuvuselelwe ama fire guard, ukuze kuvikelwe imvelo.
“Isikhathi sokutsha kweganga sekuqalile, ingakho sesiqalile lathi ukuqhuba umkhankaso wokulimukisa uzulu ukuba bevuselele ama fire guard. Sifisa beziqhelise zize zifike ku-9 metres. Abafuyi sifisa bagcinele izifuyo ukudla ukuze nxa iganga selilumathe umlilo imfuyo ithole ukudla.
“Indawo yeMatabeleland South ivame ukuba sengozini enkulu nxa sikhangele umlilo weganga. Abalimi, inkokheli zesigaba sizabanika ulwazi olugcweleyo ukuba benga ngqabela njani umlilo. Umkhankaso lo sizawuqhuba endaweni yakithi yeMatabeleland South kuze kuqale isikhathi sezulu,” kubika uMnu Musasiwa.
Ugatsha lwe EMA lunike ingqobe osomabhizimusi lozulu ukuba bagebhe imigodi yokulahlela ingcekeza. Kukanti eyinye ingcekeza beyiguqule beyenze imali.
“Umlilo uvame ukumemethekiswa yingcekeza egcwele phandle lemlilo ebaswa mahlayana nje. Ingakho sinika ingqobe osomabhizimusi ukuba bagebhe amagodi okulahla izibi zabo. Labatshayelayo bengavumeli abantu ukuba belahle ingcekeza. Sinanzelela ukuba ingcekeza le idliwa yimfuyo yethu
Ingcekeza ungayiqoqanisa kuhle ulakho ukwenza imali kuyo, bethengise bethole inzuzo. Sekulama nkampani aguqula ingcekeza ibe yimali,” kubika uMusasiwa.
