29 Mfumfu 2025
Ngu Liberty Mutamba
BENGO- Isikolo seBengo Secondary sisele sisegcekeni kulandela isiphepho esithethe uphahla lwezindlu zokufundela ezimbili, izindlu lezi zisele zibetha imoya bezisetshenziswa ngabafundi ukulobela imihloliso ye ZimSec.
Isiphepho lesi siqale izolo ilanga selizaya kunina lapho umoya osukumise uphahla. Isiphepho sidilize njalo izindlu zababalisi be Dryhock Primary, lapho esilimaze ababalisi abane.
Umgcinisihlalo wekomithi yesikolo seBengo Secondary umnu Innocent Ncube uthi isehlakalo lesi sibatshiye bemadolo nzima.
“Isiphepho lesi sitshiye umonakalo omkhulu esikolo sethu. Uphahla lwezindlu ezimbili zokufundela luhle lwasukuma. Siyakwazi ukuthi isehlalo lesi ngesemvelo kodwa sisikhathezile. Bekungani liphupho elibi ukubona amazenge esemoyeni, ngenhlanhla akalimazanga muntu.
Uphahla lonke luhambile, njalo amazenge amanye alimele ukuthi angeke siphinde siwabisele phezulu laphana. Isehlekalo lesi sifuna sihlale phansi sihlanganise amakhanda,” kubika uNcube.
Ukhansila kaward 17 umnu Ntuthuko Nyathi uthi isehlakalo esinje kumele sihlale sisilindile, njengo mphakathi.
“Imvelo iyenza okuhle lokubi, thina sibelomnyama sawelwa yisiphepho sathatha uphahla lwesikolo. Lokhu sekusinike umlando njengo ward 17 ukuthi sixhasane sibone ukuba isikolo siyalunga. Ngiyathaba ngoba uzulu seqale ukubuya lemibono etshiyeneyo etshengisa ukuthi bafuna isikolo sibuyele kusimo.
Isikolo seBengo siqakathekile ngoba inengi labantwana bakaWard 17 baqhuba izifundo zabo kulesisikolo. IBengo yiyo eleqhazo elikhulu kuzakhimizi zakuli ward,” kubika uNyathi.
Osabambele isikhundla sika Sikomitshi weGwanda lesihlalo silamgcinisihlalo we Civil Protection Unit umnu Thulani Moyo uthe umonakalo sebewuzwile.
“Isiphepho sitshiye umonakalo ezikolo ezimbili kusiqinti sethu seGwanda. Sisakhangela ukuba isimo somonakalo singanani njalo sikhangele ukuba akula mizi elimeleyo. Sizayenza okusemandleni ukuze izikolo zincediswe
Sixwayisa uzulu ukuba aqaphele ikakhulu ngalesi sikhathi ngoba izanuse zomkhathi zibika ukuba kuzaba lezulu lonyaka elingadala ingozi kuzulu,” kubika uMoyo.
