23 Zibandlela 2026
Ngu Liberty Mutamba
Amapholisa abika ukuba kulabantu abayisitshiyagalolunye abagalule emanzini ngemva kokuba imota ikhuthe ibholoho lomfula uTshangamutope eMukula esiqinti se Insiza.
Kubantu laba, omunye wabo bekulusane olungumfana okubikwa belungakawi lenkaba.
Kubika imota yohlobo lwe Toyota Noah ifike emfuleni uTshangamutope ngabo 10 ebusuku ngoLweSine umtshayeli wehla ukuyebona isimo samanzi. Kubikwa omunye undoda (passenger) obekuleyo mota wayeqela esitulweni sikamtshayeli wangenisa imota emfuleni.
Ngokuswelakala kwenhlanhla wabe khutha ibholoho imota yawela emfuleni abantu abayisitshiyagalolunye bahle bagalula.
Kumbiko oyethulwe yisikhulumeli samapholisa uCommissioner Paul Nyathi ubika ukuba imota icwile ilabantu abayisitshiyagolunye.
“Sibika ingozi eyenzakale emfuleni uTshangamutope lapho umtshayeli afike wamisa imota yakhe esiyabona isimo samanzi. Ekwehleni kukamtshayeli omunye wabagadi wabe thatha imota leyo engena emfuleni lo, obugcwele. Imota yabikhutha ibholoho yacwila, abantu bonke bavalelwa phakathi. Isehlekalo lesi senzakale ngabo 10 ebusuku,” kubika uCommissioner Nyathi.
Abantu bakulowo mango bavukele emfuleni lapho abenelise ukukhipha imizimba yabantu labo.
“Namuhla ekuseni Izikhamizi zenelise ukukhipha imizimba yabantu bonke abagalule emfuleni lo. Abahlanu bekungabesifazane abadala, abesilisa abadala ababili, osakhulayo oyinkazana kanye losane olungumfana.
Imizimba ithwalelwe emqandweni we Filabusi ukuze kulungiswe post-mortem. Ababili sebeyenelisiwe ukunanzwa yizihlobo zabo. Okunengi kuzavela ngokuya kwesikhathi uphenyo lusaqhuba,” kubika UCommissioner Nyathi
Umsakazo kazulu uxhumane lokhansila wesigaba uThulani Sibanda oveze ukudabuka ngemva kwesigameko lesi.
“Bengifake isixwayiso esikhulu ngo Mvulo ukuthi abantu bengangeni emfuleni kodwa namhla sikhuluma ngendaba le. Ngizwa ubuhlungu kakhulu ngoba abanye abantu abalaleli, silahlekelwe ngabantu ngendaba yesinqumo somuntu oyedwa kubuhlungu kakhulu kimi kanye labahlali,” kubika uSibanda.
Amapholisa axwayisa uzulu ukuba engangeni emfuleni egcweleyo.—𝐍𝐭𝐞𝐩𝐞-𝐌𝐚𝐧𝐚𝐦𝐚 𝐅𝐌 𝐍𝐞𝐰𝐬
