27 Zibandlela 2026
Ngu Mpokiseng Sibanda
Bahlalele evalweni abahlali besigaba seNkalange, Mtshatshami leMakapakapa ngemva kokudlula komhlambi wendlovu ezingaba ngamatshumi amathathu zihlangene lamathole azo.
Umsakazo kazulu uxhumane lokhansila wesigaba uEmmanuel Makhabane Ndlovu.
“Indlovu lezi zihlasele abahlali beNkalange, Mtshatshami leMaphula. Kumalanga ambalwa adlulileyo kudlule umhlambi wendlovu ezilabantwana zangena ensimini zeMtshatshami eziyisikhombisa zadla amabele zithethe icele lomango weMsilikwe kusiya kubo Cold Storage asazi ziyaphenduka nini so abe Mtshatshami leMguza sebelala belindile. Sengixwayise izakhamizi ukuba nxa zingabona umonakalo zingazise ukuze ngikhulume labe Parks ngoba makhona eduze kwethu.
“Kulomunye umhlambi otshaya phose nsukuzonke endaweni yeSukwe koTshiya eTshanyaugwe. AbeParks bakhona ukuzosincedisa ingakho kumele sikhulume ukuze zingaqedi okuncane esisele lakho emasimini,” kulandisa ukhansila uMakhabane-Ndlovu.
Emangweni lo, indlovu akusizo zodwa ezilimaza isivuno, amagundwane, inyoni, inkawu zigwele kuleyo ndawo, nangu uJosias Ndlovu.
“Ubudli lonyaka bubuye ngamandla okugoqela indlovu, inyoni, amagundwane kanye lenkawu okokuthi nxa singaqaphelanga lokuzinikela abalimi abanengi bayaphuma bengela lutho emasimini. Indlovu zilindwa ebusuku,amagundwane ahlasela ebusuku kodwa inkawu lenyoni kuhlasela ekuseni lize liyetshona,lokhu sokusitsho ukuthi abalimi abasatholi ithuba lokuphumula,” kutsho uNdlovu.
Indlovu ziyingozi kakhulu ngalesisikhathi sezulu lapho ziyabe zingela dlelo eliqondileyo lesikhathi sokuhamba kukanti eyinye ingozi isebantwaneni besikolo ikakhulu abahamba umango omude bevelela emapulazini labachapha imifula emikhulu,” kugcizelela uNdlovu.
Oyingcitshi kwezokilima umnumzana Jephius Dera osuka kunhlanganiso yeMatopo Research Station uthi ubudli bunegi ingakho abalimi bebambisane labalimis babo.
“Amagundwane manengi kakhulu lonyaka ngakho indlela zokuthi siwaphungule yikuthenga imithi sisebenzisana labalimisi loba indlela zesintu abalimi kade bezisebenzisa kudala ezigoqela ukugebha amagodi sithiyela phakathi lokusebenzisa izilaha,” kutsho uJera.
Omele isigaba sobukhokheli kuVillage Development Committee (VIDCO) ubaba uKgotso Ndlovu uxwayise uzulu ukuba akaqaphele ingozi ezikhona lonyaka sikhangela lesidlule kuzo nyakenye ezezimota kunyanga yekhefu kukanti lengozi zamanzi lonyaka emifuleni nanko abanengi sebelahlekelwe yizihlobo abangane lemuli.𝐍𝐭𝐞𝐩𝐞-𝐌𝐚𝐧𝐚𝐦𝐚 𝐅𝐌 𝐍𝐞𝐰𝐬
