20 Nhlolanja 2026
Ngu Liberty Mutamba
Kulenina elihlala eVumbachikwe Mine, Gwanda eligwetshwe iminyaka elitshumi lasikhombisa ngemva kokubamba usane olufunda iECD A iganyavu.
Lelonina elingumnikazi wendlu uSibonokuhle Nkala (43) ubelojise umama olabantwana abangabafana endlini yakhe. Kuthe nyakenye ngo Lwezi uNkala wenza inkemenkeme yendaba nango ethatha isitho sangasese somntwana okuECD A esifaka kusitho sakhe, usane lolu lungavumanga.
Kuthe ngelinye ilanga usane lolu lwembula umfowabo izigqoko lusenza isiga asenzwa ngumnikazi wendlu uNkala. Yilapho umfowabo oleminyaka ayisikhombisa ambuza khona ukuba isiga lesi usifundiswe ngubani.
Umama wasetshaya usane lwakhe ukuze lutsho ukuba lufundiswe mbani. Ngokudlela evalweni usane lwazithulela.
Kuthe ngelanga elilandelayo umakhelwane wabuza usane ukuba bebelitshayelani, yilapho olwenelisa ukutshela umakhelwane udaba lonke. Basebebikela amapholisa uNkala wasebotshwa.
Umtshutshisi uZanele Sithole ukubikele umthethwandaba ukuba uNkala wephula umthetho wokudlwengula usane.
“Umsolwa wadlwengula usane lungavumanga lokhu ingakho ngesenzo leso umsola wephula icala le Aggravated Indecent Assult as Defined in Section 66 of the Criminal Law Codification and Reform Act Chapter 9:33,” kubika Sithole.
Umantshi ugwebe uNkala iminyaka elitshumi lasikhombisa yaphungulwa ngemithathu ngoba uyaqala ukudala isono.
