23 Mbimbitho 2026
Ngu Liberty Mutamba
Ikit kanozinti weGwanda Pirates ithengwe nge USD$ 10 000, lapho iqembu leli belivula ikit elizadlala ngayo kulisizini ka 2026 kuCentral Region Soccer League Division One. UVusa Puttin Moyo uthenge ikit ngalimali esithi ilesisindo esikhulu kuye.
Iqembu lathi lisungulwa ngo 2024 unozinti walo uThemba Moyo nguye obelihola njengo Khaphuteni, lanamhla lokhu elihola. Ikit yakhe ithengwe nge USD$ 10 000.
“Ikit kanozinti ibingeke iphume ekhaya. UThemba ngumfowethu njalo ikit yakhe ilesisindo esikhulu kakhulu kithi njengemuli, ingakho siyithenge nge USD10 000. Sikwenza lokhu ukuze siphakamisa iqembu lethu leGP,” kubika uMoyo
Abalandeli batshengise ukusekela iqembu labo nanko pela bethenge le Home kit nge USD$ 4 500 kuthi amajesi wona athengwe nge USD 1 500 amanye athengwa nge USD$1 000.
Ufulegi elombala weGwanda Pirates yona ithethwe nge USD $500 kuthi, iHelmet yathengwa nge USD $200.
Iqembu lithethe isikhathi sokwethulwa kwe Kit latshengisa abalandeli abadlali abatsha abazagijima kulisizini. Ababili bavela phandle kwelizwe uSimon Malupande ngowe Zambia uAustin Ajoh ngowe Cameroon.
Kuthi uChrispen Machisi ubegijimela iBulawayo Chiefs, uJunior Sibanda obekuHardrock, laye seyingxenye yeGwanda Pirates. uPrince Chikova ubeku Nkayi United. UDenzel Dube usuka ePlumtree kuMainline FC , loThubelihle Ncube, UCarlos Ncube ubegijimela iZRP Gwanda. Kuthi uMusawankosi Munezhi ovela kuHighlanders uku loan kanye lo Mbonisi Ncube. UPrince Gwetu laye uku loan uvela kuHardrock. IBN Academy layo yafaka uTafadzwa B Mutyakureva ku loan. UAndrew N. Siziba laye odabuka kuNkayi United ukuloan.
Abadlali abafika phose itshumi bazagijima njalo kulisizini, ngemva kokuqeda behlezi kusihlalo sesithathu kusizini yanyakenye.
UTshalimani we qembu uGuqukani Mpofu uthe iqembu likhangele ukuya ku Premier Soccer League.
“Sisalolonga ukuthi iqembu lethu liyegijima luPremier Soccer League. Lonyaka sizasebenza ngokuzikhandla ukuba siphakamise indawo yakithi yeGwanda sitshengise umhlaba wonke ukuthi kulethalenta lapha ekhaya. Namhla asivuli kuphela ikit sivula amathuba wokuba sixhasane sisebenze sonke ukuze siphakamise iGwanda kwezenguqu,” kubika uMpofu.
