12 Lwezi 2024
Ngu Mpokiseng Sibanda
Dombo-Izakhamizi zikaward15 ngaphansi kukasobhuku uEmma Mazibeli esigabeni sakoMaphula zihlalele evalweni ngemva kokuba izifuyo sezihlaselwe yibuphofu.
Izifuyo zabanjwa ngumkhuhlane wobuphofu ngoba zidla isihlahla esihaqazayo idorofiya elilameva amancane aphephukayo (prickley pear cactus)
Leli dorofiya lihlasela inkomo, obabhemi kanye lembuzi okuzenza zicine zingasaboni zicine ziwela emagodini, ezinye ziyaphaphatheka zihambe ngeganga.
Ukwanele Moyo oyisakhamuzi kulowo mango uthi leso sibulala inotho yabo.
“Idorofiya leli libi ikakhulu ezifuyweni zethu, ezami zihambile ngobuphofu okwenze ngangasaziboni okudingeka ukuthi njengomphakathi sisebenze ndawonye sidinge abakhangele ngezihlahla basinike imvumo ukuba sisikhuphe ngoba imfuyo yethu iyatshabalala,” kutsho uMoyo.
UOttilia Ndou uthi sebezame amaqhinga ambalwa ukuba bavikele izifuyo kodwa kuyala, ngenxa yendlala.
“Sizamile wonke amaqhinga okuthi sisitshise lesi sihlahlakazana kodwa kungathi kasenzanga lutho ngoba lapho sesihaqaziwe ngomlilo sithandwa ngobabhemi lenkomo. Siyasibiyela ukuthi izifuyo zingafinyeleli ukuthi zidle, kodwa zibuye zinyathele phezulu zidinga leso sihlahla, zibe seziphandlwa seziqala ubuphofu ngemva kwamalanga amalutshwane,” kutsho uNdou.
Okhangele ngokondliwa kwezifuyo okugatsha lwe Veterinary services umnumzana Samson Ndlovu uthi isomiso yiso esenza inkomo zidle leso sihlahla.
“Okwenza izifuyo zithande lesi sihlahla kwenziwa yisomiso somkhathi ngoba indlala inkulu ezifuyweni. Zithanda idorofiya lelo ngoba lihlala limanzi litshengisa ukuba libuthakathaka lekuhlafuneni.”
“Sikhuthaza abalimi ukuthi abaqhubeke besebezisa imithi yesintu abayaziso, nxa besenelisa ukungena ezitolo bathenge iOxytetracycline leminye nje imithi abayitshelwa ngabe Veterinary Services,”
Kwenzinye indawo zeZansi yemaNdebeleni izulu seliqalile ukuna abantu bakhuthazwa ukuba bakhangele izifuyo.
