BREAKING NEWS
Published (24 Mpalakazi 2024)
Ngu Liberty Mutamba
AMAPHOLISA abika ukuba kubhubhe umuntu oyedwa, kwalahleka losane engozini yebhasi eyenzakale emfuleni uMletshane eKgobontwane Village, ku 67 km peg Gwanda-Mawaza, izolo.
Obhubhileyo ngu Sithembiso Dube (33) ovela ngaphansi kwenduna uKgwatalala.
Kubikwa ibhasi uGreen Horse ibilubhekise entshonalanga ithwele abantu abangama tshumi ayisikhombisa lanhlanu (75). Ingene i bholoho lika Mletshane ebelilamanzi agelezayo yasisiwa ngecele.
Isikhulumeli samapholisa kwele Matabeleland South uAss Inspector Loveness Mangena uthe kubhubhe oyedwa kuleyo ngozi, losane alukabonakali.
“Ibhasi ingene emfuleni lapho ecine isiwa ngecele. UDube uhle wabhubha kuleyo ngozi. Usane olulenyanga ezintathu alukabonakali. Umzimba ka Dube uthwalelwe eGwanda mortuary. Ibhasi ibilabantu abangu75 abanye abalimanga. Amapholisa asaquba uphenyo ngaleyi ngozi.
“Sixwayisa abatshayeli ukuba bengangeni emfuleni elamanzi. Kabalinde umfula uqale uyentshe,” kubika u Mangena.
Ummeli we Gwanda South edale le phalamende uDr Omphile Marupi seyethule amazwi akhe enduduzo ngemva kwelingozi.
“Silusizi ngengozi yebhasi eyenzakeleyo lokulahlekelwa yimpilo yezihlobo zethu Kanye lempahla emangweni we-Mawaza.
Sithi dudu kumdeni, abako Green Horse lathi sonke esithintekileyo ngalingozi.Masithole induduzo,” kubika uMarupi.
Ngena kumaWhatsApp group omsakazo ukuze uthole indaba ezingeni ezenzakala ngekhefu lekhisimusi
https://chat.whatsapp.com/JeE4iqkKI8I6cKLzTeq4kWNtepe-Manama FM
