17 January 2025
Ngu Liberty Mutamba
Bathabe bamanzi ntee, abahlali beGungwe ngemva kokuba idamu labo eladubuka ngomnyaka ka 2016 seliphelile ukuvuselelwa.
Injabulo le ayiphelelanga lapho nanko ke lelo damu seligcwele phamu amanzi okuyinto ebisiyinganekwane kulowo mmango.
Umnyaka ka 2024 ubulesomiso esikhulu esenze ukuba izilimo lezifuyo zitshabalale , konke lokhu kubangelwa yikuswelakala kwamanzi lokudla egangeni. Ukubona idamu liphela bekungani liphupho kuBonolo Sebata.
“Siyathokoza ukubona idamu leli seliphelile njalo seligcwele amanzi. Phambilini besidubeka ngamanzi njalo izifuyo beseziphila ngesikotsho. Ngokutshisa kwelanga imithambo yamanzi kukhanya ibikhatshana ngakho ke uma sibona idamu seliphelile so siyabonga kakhulu.Sibonga ummeli wethu ephamende umhlonitshwa u Marupi le Community Share Ownership Trust,” kutsho Sebata, owe Gungwe.
Omama bathi besebedele izivande ngenxa yokuswelakala kwamanzi. USitshengisiwe Dube uthi sebezenelisa ukuvusa lezo zivande.
“Izivande besesivalile ngoba singelamanzi okuthelezela. Bekunzima ukuba senze udwendwe sidinga amanzi awabantu, awezifuyo kanye lawezivande. Uma idamu lethu seliphelile njalo seligcina amanzi sezizatshona ezivandeni,” kutsho uDube.
Ukhansila ka ward 12 uMnumzana Brian Nyathi uthi utshayela ihlombe izakhamizi ngoku sukumela phezulu ekuthuthukiseni isigaba.
“Bekuqhatshwe abantwana balapha ukuthi bancedise ukuvuselela idamu lethu. Intsha labo mama bathathela phezulu loluhlelo namhla sesibona idamu lethu seliphelile. Sikhangelele ukuthi inhlelo ezinengi zizavuka zithuthukise indawo yakithi,” kubika uNyathi.
Idamu leGungwe lagqugquzelwa ngummeli wedale lephalamende we Gwanda South Constituency uHon Dr Omphile Marupi ukuba livuselelwe.
“Abantu beGwanda South bangithuma ukuba ngiyebamela ephalamende, ngathumeka. Izakhamizi ze Gungwe zacela ukuba idamu livuselelwe ngabhala ingcwadi, njalo ngaxhumana le Community Share Ownership Trust eyaba lo mlandu omkhulu ekuvuselelweni idamu leli. Abantu bakulu mango bebehamba imango ukuze bafinyelele amanzi.
Sesifinyelele abantu be Zimparks ukuba basincedise ngenhlanzi njalo abantu be tourism labo sizabadinga ukuba bakhangele ukuba indawo le ingakhanga njani izethekeli ngoba kule Culture Centre izintaba ezingalethela abantu bakulumango inzuzo,” Kubika uDr Marupi.
UMarupi utshayele ihlombe uMongameli uH.E Dr Emmerson Mnangagwa ngokunika abantu ukudla kwenkomo, irayisi ukwakhiwa kwezikotsho lezinye inhlelo zengqubekela phambili ezenziwa emaphandleni.
“UMongameli welizwe lethu uDr Mnangagwa seyenze inhlelo zengqubekela phambili. Umnyaka ophelileyo ubunzima wasinika ukudla kwenkomo, wasigebhela izokotsho. Namhla ngimi phambili kwenu ngilitshela ukuthi siphiwe amathani amane (4tonnes) ze rayisi ukuba sabelane njenge constituency yethu,” kubika uMarupi.
Kulumhlubulo irayisi izanikwa abantwana bezikolo, kukanti idamu le Gungwe lakhiwa ngemali efika US$600 000.
> 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemanama@gmail.com.
Follow the Ntepe-Manama Community Radio 97.0 Group on WhatsApp: https://chat.whatsapp.com/FM9CMb7F1K83o8KDR5Z0LX
Come Advertise With Us.
