15 Mbimbitho 2024
Ngu Milton Mashasha
Abalimi bakaward 11 kanye lo12 emhlubulweni we Gwanda South baqhubekela phambili ngenhlelo zabo zokulima ngokuthelezela njalo bakhangelele inzuzo kungenani lomkhathi ongemuhle wokuswekala kwezulu.
IBolamba Mene Irrigation (Pro Africa) ingeyinye yezivande ezibambe impilo kazulu emhlubulweni lowu. Isivande lesi sisebenzisa imisaba yelanga ukuthi sidonse amanzi okuthelezela izilimo njalo sidlala indima enkulu ekusekeleni inhlelo zikahulumende zokutholisa uzulu ukudla okwaneleyo.
Abalimi laba balime izilimo ezigoqela umumbu osuseduze lokuvunwa,imibhida,amatamatisi kanye lembambayila.
USimaliphi Gumbo ongomunye wabalimi uthe akusensukuzatshwala ukuthi avune umumbu.
“Ilanga liyatshisa okwezinga eliphezulu okucina kuphambanisa ukusebenza kwethu njengabalimi ngoba izilimo ziyabe sezifuna ukuhlalwa zithelelwa njalo nje ngoba izulu lingekho. Kodwa loba kunjalo ngikhangelele inzuzo engcono ngoba umumbu wami usulungela ukuvuthwa,” kutsho uGumpo.
USilibaziso Sibanda uthe ukhangelele inzuzo andubana esethengise izilimo zakhe.
“Umumo womkhathi mubi awujabulisi nxa sesikhangela ngenhlelo zokulima kodwa njengomlimi ngikhangelele ukuthi isivuno engizasithola lapha ngenelise ukondla imuli yami njalo ngibuye ngithole inzuzo yemali nxa sengithe ngathengise ezinye zezilimo,” kutsho uSibanda.
UReason Ndlovu ongumlimi uthe uthokoziswa yikuzikhandla kwabalimi.
“Sibumbe amaqembu amahlanu njalo iqembu ngeqembu lilabantu abalitshumi ayenzelwe ukuthelezelwa izilimo.Kuyajabulisa kakhulu ngoba abalimi bayaphatheka ngendlela ephezulu ukuthi isivande sibesesimweni esihle,” kutsho uNdlovu.
@lesego.
