07 Ntulikazi 2024
NguMilton Mashasha
GWANDA SOUTH-Izakhamizi zibonga uhlelo lokusungulwa kwesivande oluyilo oselubambe impilo zabo ngemva kokuhlaselwa yisomiso kubangelwa yikungani kuhle kwezulu.
Isivande leso sibizwa kuthiwa yi Mlenje Garden sasungulwa yizakhamizi ze Pelele, ngomnyaka ka2012 bexhaswe lugatsha lweAgritex lusekelwa yiAustralia imelwe lugatsha lweWorld Vision. Injongo yalesisivande yikusiza abaswelayo, intandane kanye labagogekileyo kungakhathalekile ukuthi usuka kusiphi isigaba.
Isivande lesi silabantu abangamatshumi amathathu okugoqela abesilisa abalitshumi lambili labesintwana abalitshumi lasificaminwembili abathola ukusizakala kuso.
Inhlelo eziqhutshwa kulesisivande yikufuya imbuzi kanye lokulima ngokuthelezela kusetshenziswa insaba zelanga.
Umsekeli kanombala walesisivande uTaelo Dube ekhuluma lomsakazo kazulu iNtepe Manama Community Radio uthe ingadi le iluncedo kakhulu emphakathini.
“Lesisivande silusizo olukhulu ngoba intandane ezinengi Kanye labagogekileyo bayasizakala kunzuzo etholaka kiso. Indleko zesikolo ziyeneliseka ukubhadaleka nxa sekuthengisiwe isivuno babuye bathole lokudla kokuthi badle emakhaya abo,” kusitsho uDube.
UHupulo Makwaiba ongomunye wabaphathekayo kulesisivande uthe imbayathola inzuzo yokuthi bondle imuli zabo.
“Siyathengisa isivuno esisithola esivandeni okuyikho okusisizayo ukuthi senelise ukuthola ingcosana yokondla abantwana kanye lokudla,” kusitsho uMakwaipa.
UPriviledge Ndlovu uthe isivande lesi silamulelwa abantu abanengi ebunzimeni.
“Siyathengisa izilimo ngemva kokuvuna sinikeze abaswelayo ikakhulu, lenhlawulo yesikolo iphuma khonapha. Lathi njengesigaba siyancediseka ukuthi Sithole okuya ethunjini,” kusitsho unkosazana Ndlovu.
Uqhubeke esithi loba umsebenzi wabo umuhle kodwa balohlupho abahlangana lalo.
“Silohlupho lomtshina wethu awusadonsi manzi ngemfanelo ngoba sisebenzisa i-invetor encane esuka ikhulelwe ngumtshina ekudonseni amanzi amanengi osekwenza izilimo zethu zingatholi amanzi ayenelayo. Sesithelezela langemigqomo ukuze amanzi enele ezilinywen,” kubuka uNdlovu.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
@ lesego.
