13 Mpalakazi 2024
Ngu Liberty Mutamba
Iqembu elingakabi lomnyaka libunjiwe kumdlalo kanobhutshuzwayo iGwanda Pirates selinqobile kuligi yeMatabeleland South Division 2, ukuba zintshatshu sekubanikeze igunya lokudlala kuCentral Region Division 1 ngomnyaka ozayo.
IGwanda Pirates (GP) igqibe isizini ngokunqoba iJessie Mine nge 2 lika 0 enkundleni yeGodini eGwanda ngempelaviki.
Iqembu elisakhulayo selithole abalandeli abanengi edolobheni njalo ukutholakala kwabo enkundleni zokuxhumana sekubanike ibizo elithi, ‘TwitterKings.’
Besukumisa inkezo ye Division 2 abadlali bathe isizini ibinzima kodwa ukusebenza ngokuzikhandla kubenze banqoba. UMike Chikovore (c’mola 03) ongomunye wabadlali uthi ukubambana njenge qembu kulethe inkezo.
“Iqembu lethu liqale ngomfutho omkhulu, njalo injongo yethu bekuyiku nqoba, siyathaba uma sinqobe ku Division 2. Besisebenza njenge qembu, silalela umqeqetshi wethu, silungisisa amaphutha ethu ngokubambana ngikwenza njalo lokhu kusiphathisile kakhulu,” kutsho uChikovore.
Umqeqetshi weqembu leGwanda Pirates uYorum Ngwira uthe basebenze lozulu jikelele ukuthi benelise ukunqoba.
“Iqembu lithole abantu abasebenza kakhulu. Abadlali, abalandeli kanye ubukhokheli bebuhlaziya izinto zonke ngobunono langobuqotho ngalokhu besinelisa ukuzwisisana njalo sibuye lesisombuluko silungise amaphutha.
“Sikhangelele ukuthi ku Division1 siqhubeke sisenza kuhle, njalo silabadlali abafuna ukunqoba,” kutsho Ngwira.
Iqembu litshayela ihlombe abalandeli balo ngoxhaso kusukela lisungulwa. OnguTshalimani eqenjini leli uMnumzana Guqukani Mpofu uthe bazenza okusemandleni ukuba iqembu linqobe liye phambili.
“IGP isakhasa, ngokunjalo asikatholi abasinceda ngezimali. Sincedwa ngabalandeli njalo sibatshayela ihlombe kulokho. Sifunde okunengi ku Division 2 siza funda njalo ku Central Region Division 1.
“Iphupho lethu yikuthi kube leqembu ephuma eGwanda ezadlala ku Premier Soccer League. Siyananzelela ukuba eGwanda kulabantu abalesiphiwo kweze nguqu sifisa, ukuphakamisa indawo yakithi,” kutsho uMpofu.
Umlandeli omkhulu weqembu uMthokozisi Moyo uthi bazimisele ukusekela iqembu lize lifike ku Premier Soccer League.
“Kuqembu le Gwanda Pirates asisuki, njalo sizaleseka size sidlale laku Premier Soccer League. Siyajabula ukuba bayanqoba asebenza kuhle amadoda,” kutsho uMoyo.
IGwanda Pirates isizadlala lamanye aqembu angosowabo i Blanket Mine FC, ZRP Gwanda, West Nicholson adlala ku Central Region Division 1.
