21 Nhlolanja 2025
Ngu Liberty Mutamba
Kulodaba olutshwaqisa umzimba lapho umama uSithulisiwe Ndlovu(52) weGaranyemba uthethwe ngamanzi ensukwini ezedluleyo ezama ukuchapha umfula uSengezane.
Kubikwa umama umaNdlovu utholakale sebhubhile.
Kusenjalo kulomfundi wesikolo seNtepe Primary laye othethwe ngamanzi ensukwini ezedluleyo. Umfundi lo ubezama ukuchapha isifudlana uSholembgwa esaziwa ngokuthi ‘Umfula wakoChikomo’ sebuyela ngakibo. Umfundi lokhu esadingwa.
Usikomitshi we Gwanda, njalo engumgcinisihlalo we Civil Protection Committe esiqintini seGwanda uNomathemba Ndlovu ubikele umsakazo kazulu ukuba izulu selidale umonakalo kulumango.
“Liqiniso, umama weGaranyemba ubezama ukuchapha umfula uSengezane, esanda kudlula idamu leGaranyemba. Kukanti umfundi wesigaba sesithathu (Grade 3) esebuyela ngekhaya lapho ahle athathwa khona yisifudlana abesichapha. Umfundi kakatholakali sekubizwe abantu ukuthi bangene umfuleni bamdinge kodwa ngebhadi lokhe engakatholakali.
“Sixwayisa uzulu ukuba engachaphi umfula njalo amakhansila ancedise ekuthumeleni imilayezo ekhangelane lengozi ezidalwa lizulu,” kubika uNdlovu.
Osabambele isikhundla sesikhulumeli samapholisa eZansi yemaNdebeleni uAssistant Inspector Stanford Mguni uxwayise uzulu ukuba bengangeni emfuleni elamanzi.
“Bazali asilandeni abantwana bethu ezikolo ukuze sibavikele engozini ezifana lalezi. Ababalisi labo siba khuthaza ukuba bafundise abantwana ngengozi ezibangelwa lizulu, njalo bengakhiphi abantwana esikolo uma izulu lithwala. Abatshayeli bezimota labo bakhuthazwa ukuthi bengangeni kuma bholoho nxa umfula ulamanzi,” kubika uMnu Mguni.
Follow the Ntepe-Manama Community Radio 97.0 Group on WhatsApp: https://chat.whatsapp.com/FM9CMb7F1K83o8KDR5Z0LX
𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
