12 Lwezi 2025
Ngu Reaboka J Nare
GWANDA SOUTH -Amalungiselelo okuvula ngokusemthethweni kwedamu leGungwe asesebangeni eliphezulu. Idamu elinceda umphakathi, lemfuyo selilethe utshintsho kulowo mango.
Idamu leli seligcina amanzi asebenza ezivandeni, kumfuyo likhangelelwe ukuvulwa ngu Minister okhangele ezamaNdaa lokuthengiselana uHon Nqobizitha Mangaliso Ndhlovu.
Okhangele isigaba seZansi kwezengqubekela phambili lentuthuko uHon Albert Nguluvhe, omele abantu be Gwanda South edale le phalamende uDr Omphile Marupi, uNkosana uJim R Goddard bakhangelelwe ukuba kulumkhosi ozaqhutshwa mhlaka 13 Lwezi(Kusasa), edamu le Gungwe.
Idamu leli ladabuka ngomnyaka ka2017 lapho okwadubuka amanye ayisithupha lona lazovuselelwa ngo 2024 yi Community Share Ownership Trust.
Izakhamizi zikaWard 12 zisebenza ngamandla ukuba umdlalo omkhulu uhambe ngendlela umnu uReason Wadenga, oyisakhamuzi sakulowo mango ubike ukuba ukwakhiwa kwedamu leGungwe kwaletha intokozo enkulu.
“Ukwakhiwa kwedamu leli, kulethe intokozo enkulu kakhulu kuzakhamizi zika ward 12 ngoba izifuyo azisahambi umango omude zidinga amanzi. Selilethe impilo entsha emphakathini ngoba izakhamuzi sezinathisa izifuyo, izivande sezithola amanzi okulima. Abanengi sebezitholela imali ngalokho,” kubika umnu Wadenga.
Umlimisi uTsiamo Nare okaWard 12 uthe ukudabuka kwedamu bekubatshayisa amakhanda.
“Ukudabuka kwedamu leGungwe bekulethe inhlupho ezinengi kuWard 12 ngoba abalimi bafelwa yizivande, lezifuyo. Izikotsho ngobunengi zaseziphela amanzi okwasekusenza ukuthi abalimi bathathe isikhathi esinengi belinde amanzi ukuthi banathise izifuyo,” kutsho umnu Nare.
Ukhansila ka ward 12 umnu Brian Nyathi uthe abahlali bawuqhuba kuhle umsebenzi wamalungiselelo
“Izikhamizi ziqhuba umsebenzi kuhle ngilethemba njalo ukuthi lizavulwa kuhle ngokusemthethweni mhlaka 13 uLwezi. Ngilethemba imisebenzi yokulima, izayenyusa umnotho wendawo. Kuyasiphakamisa njenge sigaba njalo kuyasithokozisa ukuhlanganyela ngomkhosi ojabulisayo njalo kuletha ingqubekela phambili,” kutsho ukhansila uNyathi.
