15 Mbimbitho 2026
Ngu Jonah B Moyo
Amapholisa asebambe umsolwa uMnu Nuni Ngulube obelime izihlahla zembanje ezilikhulu lambili(102) emasimini akhe aseduze lomfula uKafusi, ku Village 6.
Umsolwa zimkhalele esathi ufihlile kukanti okulempondo akufihlwa emgodleni. UNgulube ubelime imbanje wazicatshisa ngomumbu ukuze zingabonakali. Abomthetho bathe sebelunywe indlebe bamlanda ekhaya esalibele bayezithola imbanje zigcwele emasimini zisaphephethwa ngumoya ziphakathi laphakathi komumbu, bazigumula belomsolwa kanye lomkakhe uBeauty Sakhala Ncube.
Isikhulumeli samapholisa seZansi yemaNdebeleni uInspector Chiratidzo Dube uthe isiga lesi siyenzakele njalo umsolwa sebotshiwe.
“Salunywa indlebe njengamapholisa saphenya sahamba kumsolwa wavuma ukuhamba lathi lapho abehlanyele khona imbanje zakhe, sathı sifika sathola zigcwele insimu zivalelwe ngumumbu ukuthi zingakhanyi.
“Imbanje lezi ezinye zingama 1mitha ezinye 2mitha ubude, sazigumula zonke(102) njalo isisindo sazo asikasitholi sizalazisa singasithola,” kutsho uInsp Dube.
UDube uphinde wathi wonke umuntu ohlanyela imbanje okungekho emthethweni uzahlangana lezankosi.
“Ukuhlanyela imbanje okungekho emthethweni kulicala, njalo sikhuthaza uzulu wonke ukuthi angaphatheki ekuhlanyeleni imbanje okungekho emthethweni njalo wonke umuntu okwaziyo ukuthi uyazihlanyela okungekho emthethweni kame ngoba sizamvalela singamapholisa,” kutsho uDube.
Amapholisa axwayisa uzulu ukuthi angaphatheki ekukhuphuleni izinga lokusetshenziswa kwezidakamizwa ngoba njengelizwe siphezu kokuliswana lokwehlisa ukusetshenziswa kwezidakamizwa ngoba intshwa iyaphela.
