BY KWAKHIWE DUBE
COMMUNITY REPORTER
ABAHLALI bakaward 14 eGwanda abatshaya izitina bakhala ezimathonsi ngesinqumo esifakwe ngumlisa wesigaba uMnumzana uDubane ngenxa yokuguquka komumo womkhathi.
Embikweni wakhe uMnu uDubane uthe iskhathi sokutshaya uphinde utshise izitina siphela mhlaka 31 Ntulikazi kodwa wengeza ibanga lokuthi ongakatshisi kusiyafika umhlaka 15 Ncwabakazi zibe sezitshisiwe ukwenzela ukuthi intuthu zezihlahla zingaphambanisi umumo womkhathi njengoba iskhathi sezulu sesisondele.
Ekhuluma ngaloludaba omunye wabahlali bendawo uthe yena kunzima ukuphila kuye nxa engatshayi izitina ngoba kuyikho okuletha impilakahle emulini yakhe.
“Mina lesi sinqumo esifakwe ngubaba uDubane sizaba nzima kimi ngoba izitina lezi engizitshayayo yizo eziletha ukudla etafuleni.
“Kunjalo ngoba bengitshaya lezo zitina besengithengisa lapho engithola imbitshana yokondla imuli yami,” kutsho uMnumzana Ncube ongomunye wezakhamuzi zeSengezane.
Omunye wabahlali uthe yena ulovalo ngoba ezinye zezitina zakhe azingakatshiswa manje nxa sokuthiwa zingasatshiswa akazi uzazivala ngani ngoba zizanethwa zibe ludaka amandla akhe aphelele emoyeni.
