BY KWAKHIWE DUBE
COMMUNITY REPORTER
SENGEZANE- Umnumzana Jimmy R Goddard ongumlimi omkhulu ezansi yemaNdebeleni uthembise abahlali baka Ward 14 esigabeni seSengezane ukuba uzabavulela insimu yokulima ngokuthelezela engaba zinkulungwane (1000) yama hecta lapho abatsha abangaba ngamakhulu amane(400) bengavulelwa amathuba emisebenzi .
Leyi ndaba ivezwe ngukhansila kaward 14 uMnumzana Phineas Maphosa owethule lumbiko emhlanganweni wesigaba kuviki eyedluleyo obewenzelwe eGuyu.
Ekhuluma kulomhlangano ukhansila Maphosa uthe uMnumzana Goddard utshengise ukuzimisela ekuthuthukiseni impilo yabantu beGwanda.
“Ubaba uGoddard uzavula insimu yokulima ngokutheleza engaba yisilinganiso eyinkulungwane (1000 hectors) njalo uthembise ukuvula amathuba omsebenze kwabatsha abangaba ngamakhulu amane (400) abasuka kuWard 14,” kutsho uKhansila.
UMaphosa uqhubeka elandisa ukuba uGoddard uzancedisa lakwezinye inhlelo ezihlose ukuthuthukisa isigaba sikaWard 14 ekhangele kakhulu kwezokulima lakwezokufuya.
“Ubaba uGoddard uthembise njalo ukukhweza idamu lakoMatshayimpunzi ngamamitha amahlanu ( 5 metres) lona elibamba amanzi ngetshebetshe ukuze impompi zithathele khona amanzi okuthelela” kutsho ubaba uMaphosa.
Umnumzana Richard Dube ongusabhuku wesigaba seSengezane ekhuluma lentatheli zindaba yeNtepe Manama uthe:
“Siyabonga lokhu esikuzwayo kungumbiko omuhle kakhulu njalo kuyajabulisa.”
Omunye wabontanga uSipho Ncube uveze ukujabula laye ukuthi abatsha labo bathenjiswa ukuthola imisebenzi esithi kuzehlisa inani lentsha esiphephela ezidakamizweni.
“Siyajabula ukuzwa ukuthi kulomsebenzi ovukayo, sicela kuphumelele kungabi yinto ezaphelela emoyeni ukuze abatsha labo basebenze bakhohlwe izidakamizwa.”
NMCR#2022
