BY KWAKHIWE DUBE
COMMUNITY REPORTER
SENGEZANE- Ukuswelakala kwezulu sekukhuphe abalimi ukudla emlonyeni ezigabeni zeGwanda.
Isimo asimanga kuhle emasimini kulomango lapho izilimo ezifana lomumbu aziseyikuvunwa kulandela ukunyamalala kwezulu.
Izilimo sezitshile njalo seziphenduke ukudla kwezifuyo.
Ekhuluma lentatheli zindaba yeNtepe Manama FM ngenhlinziyo esiphele ithemba njalo ebuhlungu omunye wabalimi uUnexpected Tshuma uthe ukuswelakala kwezulu sokubatshiye ebunzimeni bengazi ukuba ikusasa ibaphatheleni.
“Akusajabulisi okusemasimini ngoba izulu lisiphoxile kakhulu njengoba izilimo zethu sezitshile okuzwisa ubuhlungu. Lanxa izulu lingabuya akusela buhle, asiseyi kuvuna ngoba izilimo zethu sezidlulelwe yiskhathi njalo ziswele amanzi okweskhathi eside” kutsho uTshuma.
Omunye wabalimi umama uTrezia Gwebu uthe indlala lonyaka izabuzwa kubantu basemaphandleni eGwanda ngoba izulu lihambe laphulula.
“Lokhu okwethu kunzima lonyaka, indlala izabuzwa kithi emaphandleni ngoba izulu selisikhiphe ukudla emlonyeni. Sizabulawa yikuthenga impuphu yona ingabambeki ezitolo lemali yakhona ingekho” kutsho uMaGwebu.
Abalimi babhekane lobunzima obukhulu emasimini njengoba lalo ilanga selivuke okunye seliqedisela okuyizilimo okusaqinisele.
NMCR#2022
