06 Ncwabakazi 2024
Ngu Patson Ncube
GWANDA-Omama lamantombazana asakhulayo bebethe gwaqa edolobheni lase Gwanda, eBrethen International Church of Christ lapho abekade bejabulela usuku lwe hepatitis.
Inhlanganiso ezibona ngempilakahle yabomama iWomen Coalition Of Zimbabwe (WICOZ), iCentre for Sexual Health and HIV AIDS (CeSHHAR), kanye le National Family Planning (NFP) bezikhona ukuzohlomisa omama ngolwazi oluphathelane lokuzithuthukisa kunye lokuqakatheka kwamalungelo abomama.
Umgcini sihlalo wogatsha lwe (WCOZ) obona ngeziphathelane labomama abasakhulayo uSithembinkosi
Gumbo uthe ukuthakazelela usuku lolu kuqakathekile kubomama ngoba bethola ulwazi lokuzivikela emkhuhlaneni lowu.
“Namhla njengabomama beGwanda siyajabula kanye labomama bonke emhlabeni wonke jikelele sinanza usuku lolu olwe Hepatitis B. Sixhaswe ngabezempilakahle ukuthi bazosifundisa ngomkhuhlane lowu ukuthi sibelolwazi ukuthi ungumkhahlane mhlobo bani njalo ubangelwa yini lokuthi singawuvikela kanjani,” kusitsho unkosazana Gumbo.
Unkosazana Gumbo uthakazelele imfundiso evele kwabezempilakahle ngoba ethi izasiza omama ekulwisaneni lobhubhane lomkhuhlane lowu.
“Okusijabulisayo namhlanje yikuthi abezempilakahle basifundise okunengi ebesingakwazi njalo kuzasiza omama abakade bephathekile kuhlelo lolu. Ngoba sinanzelela ukuthi kuba lendaba ezikhulunywayo ngomkhuhlane lowu ezingadukisa omama zibangele ukuthi bengatholi usizo olufaneleyo kwabezempilakahle ngakho ke lokhu kuzavula ingqondo zabanengi babelokuqedisisa bavikeleke.”
Okhangele ngoku qhutshwa kwenhlelo kunhlanganiso ye National Family Planning uMongikazi uOnnie Mupunga uthe iHepatitis B ngumkhuhlane ohlasela isibindi .
“IHepatitis B ngumkhuhlane ohlasela isibindi ubangelwa ligcikwane le virus.Umkhuhlane lo uyakwanisa ukuthi uhlale okwesikhatshana emzimbeni kumbe uphile lawo impilo yakho yonke ngoba amavayirasi amanengi kawayelapheki kodwa ayavikeleka ngokungena emacansini sivikele ngekhondomu, ngokungangeni emacansini njalo lokuxwaya ukusebenziselana izinto ezihlabayo.
“Omama kumele baziphathe kuhle babe yisibonelo ekuvikeleni umphakathi emikhuhlaneni lokumemetheka kwayo,” kusitsho unkosazana Mupunga.
Ukhuthaze omama ukuthi bayehlolwa umkhuhlane lowu emtholampilo.
“Asihambeni ngobunengi ezibhedlela siyehlolwa imikhuhlane etshiyeneyo mahala kungelandleko. Silabo omama elihlala labo emawadini abakhangele ngenhlelo zempilakahle kasisondeleni siyobhalisa kuzasisiza nxa sesithe savakatshela emtholampilo.”
UGrace Gumbo olilunga lenhlanganiso yeWICOZ ongumhlali kaward 7 uthe sekuthe dlwe kuye mayelana lomkhuhlane lowu ngoba ubesemnyameni.
“Ngifunde ukuthi umkhuhlane we Hepatitis B uthelelwana njani njalo ngabuya ngafunda ngomkhuhlane wofuba ukuthi nxa umuntu elawo kumele ahlale endaweni etshaya umoya sikhathi sonke ngokuhlala amafasitela evuliwe Kanye lokuhlala phndle okubetha khona umoya,” kusitsho unkosazana Gumbo.
uThandekile Sibanda ongomunye obephathekile kuhlelo lolu olilunga lenhlanganiso yabomama abasakhulayo uthe ufunde kakhulu ngemikhuhlane etholakala kubomama.
“Ngifunde ngemikhuhlane eminengi etholakala kubomama ikakhulu leyi ephathelane ngobuhlungu emzimbeni, kuvuvuka kwembilaphi ukuthi zimpawu ezitshingisa ukuthi kuyabe kukhona okungahambi kahle emzimbeni ngakho ke kumele ozizwa enjalo asondele kwabezempila kahle athole usizo, ” kusitsho unkosazana Sibanda.
UMervis Ngwenya uthe intsha ilenhlanhla ngokuthola izifundo ezihle ezifundisa ngokuthi omama mele baziphathe njani.
“Intsha yanamuhla ilenhlanhla ngoba ithola imfundiso yokuthi baziphathe njani njengabomama bakusasa thina asizange salithola lelithuba.Ngikhuza njalo intsha labadala ukuthi mele sizimisele ekulwiseni lokumemetheka kwemikhuhlane njalo sivikele masingena emacansinsini.”
“Okunye okumemethekisa imkhuhlane yikungananzwa kwamalungelo abomama kucina kusenza besabe ukuthi batshele omkabo ukuthi bavikele nxa sebesesikhathini socansi,” kusitsho unkosazana Ngwenya.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴.
