11 Ncwabakazi 2024
NguMilton Mashasha
GWANDA SOUTH- Lehlile inani lenkomo ebezizobukiswa ezibayeni zeGungwe izolo kubangelwa yikwehla kwenani lemali osekuthengwa ngayo inkomo.
Inkomo sezithengwa nge R3000 kusiyafika kuR3500 kusetshenziswa imali yeningizimu Africa osekubangele ukuthi abalimi abanengi badele ukuthengisa izifuyo zabo.
Umsakazo kazulu iNtepe Manama Community Radio uxhumane loMlapisi Mathe oyisakhamuzi eGungwe ngaphansi oveze ukungathakazeleli intengo obekuthengwa ngayo izifuyo embukisweni.
“Bengikhangelele iR7000 kumali yeningizimu Africa kodwa bona abathengayo bathi bayifuna nge R3500, hatshi angivumelani lakho lokhu, incane kakhulu leyo mali ngoba ngiyabe ngikhangelele ukuthenga ukudla kwenkomo kanye lokudla kwabantwana,” kusitsho umnunzana Mathe.
URodgers Nyathi uthe nxa abalimi bethengisa izifuyo zabo bakhangelele inzuzo hatshi ukuthengisa ngemali encane.
“Mina ngingumlimi ngiyafuya ngithengisa ngithole inzuzo kuzifuyo zami yiwo umsebenzi wami njengomlimi ngikhangelele ukuthola imali angingeke nganika umuntu inkomo yami ngentengo ephansi, ngikhipha inhlawulo ezinengi ngilondoloza lezizifuyo, imali zesikolo ngikhangelele khonapha, ukudla khonapha, Mina bengifuna iR6500 kulinkomo bona bathi ngibanike ngeR3000 hatshi akuhambelani kungangcono ngibuyele layo ekhaya,” kusitsho uNyathi.
UZephania Mavela Nyathi uthe umbukiso lowu kawubaphathelanga indaba ezinhle njengabalimi.
“Intengo yenkomo iphansi kakhulu, kuyafana lokuthi akula mbukiso, akulunganga ukuthi bakhangele inkomo ngamehlo sebesitsho intengo yayo, sifuna isikali, inkomo the kumele ithengiswe ngobunzima bayo,” kusitsho umnunzana Mavela Nyathi.
UThusitse Mashila uthe intengo ayimthokozisi.
“Intengo iphansi kakhulu, abathengayo bayakhohlwa ukuthi sithwala nzima ukufuya lokwalusa lezizifuyo, abasinanzi njalo lezikhalazo zethu zokuthi intengo ikhuphuke kancane abazilaleli kodwa bafuna ukuthatha ngaleyo ntengo ephansi,kuyinto ebuhlungu kithi abalimi,” kusitsho uMashila.
UNaison Dube uthe kasuthisekanga ngenani lentengo ebikhona.
“Angisuthisekanga ngentengo ngibuye ngikhangelele intengo engcono kakhulu ngoba ngifuna ukulondolaza umhlambi oseleyo kodwa ke akusahambanga ngemfanelo ngoba imali yakhona kayeneli,” kusitsho uDube.
Uqhubeke esithi kudingakala ukuthi abakhokheli bakhulumele abalimi ukuze udubo olufana lalolu luphele.
“Abakhokheli bethu basimele kulintengo bakhulume labathengayo ukuze izifuyo zethu zingathathwa ngentengo ephansi ngoba umhlambi uyatshabalala, sifuna ukugcina eziseleyo kodwa nxa ungelamali ngesomiso lesi awungeke wenelise ziyaphela zonke.”@ lesego.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
