26 Mmesa 2026
Ngu Milton Mashasha
MANAMA-Intsha lozulu sebethola ulwazi lwamaComputer kundawo yokufundela imitshina yakulezinsuku kanye lokungena ebulenjini kungela mbadalo.
Lolulwazi baluthola eManama Digital Centre etholakala eManama Business Center enumber 8. Lokhu kuzaphathisa abasakhulayo kanye lezakhamizi zikaWard 17 kanye lezigombolezele liWard.
Inengi lakulindawo lazi ukuthi lindawo yiCommunication Centre kumbe Post Office.
Ekhuluma lomsakazo kazulu uKhansila ka Ward 17, uCllr Ntuthuko Mabulala Nyathi ubike ukuba le yintuthuko enkulu kakhulu esigabeni.
“Leyo yingqubekela phambili eyenzakele esigabeni sami, yinto enhle kakhulu, izaphakamisa isigaba lezigaba esakhelane lazo. Sikhangela ukuthi abantwana abancane, abatsha kanye lezakhamizi bazasizakala ngaloluhlelo olungafuni mbadalo.
“Siyakwazi ukuthi kulabantwana abangakwanisiyo ukuthola lolulwazi lwamacomputers ngezizatho ezithize ezibayenza basilele kungasintando yabo. Ingakho iManama Digital Centre izaphathisa abantwana abancane okokuthi sebezakwanisa ukwenza izifundo zamacomputers eminyakeni yabo yaphansi. Kukanti labana abafundayo abasesikolo bayabe sebedinga abakufunayo ngezifundo zabo lula ebulenjini,ā kubika uCllr Nyathi.
“Ubulembu buhlanganisa umhlaba wonke jikelele yikho abasakhulayo labo bayabe sebelamathuba okuncithisana labanye ebulenjini lomhlaba wonke.
“Izakhamizi lazo ezifuna ukwenza izifundo zamacomputers zikhululekile ukwenza lokho kanye lokungena ebulenjini kungela mbadalo,ā kubika uNyathi.
UNyathi uthe iManama Digital Centre izatshintsha impilo zabantu bakulowo mango.
“Kuyangithokizisa ukubona ingqubekela phambili eyisimangaliso esigabeni sika Ward 17 kanye lendawo ezigombolezeleyo.
“Ngiyathembisa ukuthi ngalingqubekela phambili impilo zabantu zizatshitsha akusoke kufane lakudala njalo sesihambelana lesikhathi,” kubika uClr Nyathi.
UNkosikazi Uteng Sibanda onguye oqeqetshisa kulezo zifundo eManama Digital Centre ubike ukuba bayafundisa izifundo zemitshina yakulezinsuku amaComputers.
“Siyafundisa izifundo zemitshina yakulezinsuku amaComputers ukuze umuntu kumbe umntwana abe lolwazi lokusebenzisa icomputer. Siqalisela ebantwaneni abancane lakuzakhamizi kungelambadalo okwakathesi. Kodwa sithanda ukwazisa ukuthi nxa uleminyaka elitshumi lesithupha kusiya phezulu ubuye lesithupha(ID). Kule-Wifi njalo abafuna ukungena ebulenjini kungelambadalo kukanti kunengi esikwenzayo eManama Digital Centre okuphathisa uzulu,” kutsho uNkosikazi Sibanda.
UMnuzana Samson Kokobele Ndlovu oyisakhamuzi seNumber 8 ubike ukuba intuthuko leyo izabatshiya kwesinye isibanga esiphakemeyo.
“Lintuthuko izasitshiya kusibanga esiphezulu ngoba nanko abantwabethu sebefunda amaComputers lokungena ebulenjini kungela mbadalo okuyinto enhle kakhulu ezathuthukisa isigaba lokunikeza abantwana ulwazi ukuze bahambelane lesikhathi,” kubika uMnu Kokobele Ndlovu.
