25 Mabasa 2026
Ngu Princess Mahlangu
Akubizwa ozwayo namhla eManama High grounds lapho iqembu leManama Football Club liqala imidlalo yalo yeZIFA Division 2, yalonyaka.
IManama FC izangqikilana leqembu leBlack Tigers kumdlalo okhangelelwe ukuba lukhuni njalo uthokozise abalandeli bomdlalo wenguqu.
IManama FC yasungulwa ngenyanga kaNhlolanja nyakenye ngenhloso yokuthuthukisa unobhutshuzwayo lokulibazisa kanye lokuncintisana.
Nyakenye iqembu leli lakhombisa ukuzimisela, ukubambana, kanye lokusebenza gadalala phakathi kwabadlali, abaqeqetshi kanye labalandeli.
Ngesizini yalo yokuqala, iManama FC yadlala kuZIFA Division 2 Mat South League kuPool A, lapho elenze khona ngaphezu kokuba leliqembu belisanda kusungulwa. Abadlali batshengisa ukuzinikela, isifiso, ukuzimisela enkundleni, okwenza iqembu latshengisa umphakathi ukuthi lingancithisana kusigaba esiphezulu.
Ekupheleni kwesizini, iqembu laqeda lisesibangeni sesikhombisa kuligi, okuyimpumelelo enkulu eqenjini ebeliitsha kuDivison 2.
Impumelelo le ibangelwe yikusebenzisana okuhle phakathi kwabadlali, ubuholi obuqinileyo, kanye lokwesekwa okuvela kubalandeli bomphakathi.
Ngesizini le, entsha, iManama Football Club ikhangele phambili, ihlose ukuthuthukisa indawo yayo kuligi kanye lokulwela izicoco.
Iqembu leManama FC lidibana leqembu leBlack Tigers eliliqembu elitsha kuDivision 2 .IManama FC ikhangelele ukunqoba kulumdlalo ozadlalelwa eManama High School ngehola lesithathu.IManama FC ilabadlali abalodumo ababalisela uGifford Mleya,Last Nkomo, Emmanuel Msipha, Kgosi Sibanda,Mncedisi Dube,Hoetsaetsi Tlou kanye loMaster Dube.
Lokhu kwenza amathuba alo okunqoba abephezulu ngokuba labadlali abadlala ngobunono obuphezulu ikakhulu sikhangela umgadli wabo uGifford Mleya.
Kukhangelelwe ukuthi abalandeli labobonke abantu baseGwanda South babe yingxenye yalumdlalo, kungaba ngokusekela, kumbe ukusebenzisana kwezinye indlela. Iqembu nxa lidlala ekhaya umphakathi kuyisisekelo sempumelelo yeqembu, njalo ukusebenza ndawonye yikwakha ikusasa eliqakathekileyo leManama FC sinanzelele ukuthi liyabe lidlalela ekhaya.
