08 Nkwenkwezi 2026
Ngu Liberty Mutamba
Abathanda amachacho lezigingci bazaba lethuba lokugidiswa ngumhlabeleli olodumo odabuka kweleSouth Africa, UBoohle uzabe eqala ngqa ukugidisa bantu be Gwanda selokhu wazakhela udumo kwezomculo.
UBoohle uzabenandisa exhaswe ngabahlabeleli abadabuka eGwanda.
Kulimpelaviki abantu bazalubhekisa eMosa house ukuyethola ukudla kwamehlo okuzethulwa ngumhlabeleli lo. IMosa House iyabe iqala ngqa ukugidisa umhlabeleli waphandle kwelizwe.
Phambilini indawo le isike yanika abantu be Gwanda ithuba lokuzithokozisa begida, ike yenza umcimbi we Swan lapho uNisha Tee, Chilspot records, abagidisa khona abantu kwaze kwasa.
Indawo le isinike njalo abahlabeleli bakulumhlubulo ithuba lokuthi baveze iziphiwo zabo kwezomculo nanko phela uKaykid Umfanomsotho lo Fly bathokozisa abantu ngelanga lika zibuse.
Kuvideo ekhitshwe nguBoohle useqinisekisile ukuba kusasa ngoMgqibelo 9 uzanandisa eGwanda.
“Salibonani nguBoohle lo, okhulumayo ngithanda ukulazisa ukuba ngizabe ngikwele Zimbabwe ngigidisa eGwanda e Mosa House ngoMgqibelo. Asihlanganeni lapho sithokoze,” kutsho uBoohle
UBoohle (Buhlebevangeli Manyathi) sewacula ingoma ezinengi ezithandwa ngabantu ezibalisa uShela, Ngibambe eduze, Hamba wena, Mina nawe lezinye ezithandwa ngumphakathi.
UBoohle ulethwa yi DTL Records ukuthi ezogidisa abantu nanko phela kuthakazelelwa inyanga yabo mama. Umhlabeleli ka Shela uzenelisa ukugidisa abantu elo Zhezhingtons, Zagoe Radge, kuthi Blavk Operator lo Dj Wyqlif bazabe bencweba imitshina emuva. UMagibogibo uzabe egiya ngemicrophone kuze kuse.
Abaqoqa umcimbi lo, babika ukuba konke kuhamba ngendlela njalo abantu kumele babuye ngobunengi bezobona ukudla kwamehlo eMosa House.
