08 Nkwenkwezi 2026
Ngu Liberty Mutamba
Isigaba seZansi yemaNdebeleni sesiqoqe imali engange USD$ 24 000 le ZWG 2000 ezancedisa ukulwisa izidakamizwa kulesisigaba.
Imali le, izancedisa ukwakha izakhiwo ezizagcina abantu abathatha izidakamizwa, ukubopha abathengisayo lokwehlisa inani labantu abathatha lezi zidakamizwa, ikakhulu intsha.
Kusukela ngoZibandlela lonyaka sekubotshwe abantu abafika amakhulu amane bekubhizimusi lezidakamizwa. Kubantu laba inengi labo ngabesifazane.
Izansi yema Ndebeleni ihlezi enzikini yezidakamizwa nanko phela ilemingcele emine esetshenziswa ngabantu ukuchaphisa izidakamizwa lezo.
Okhangele ngengqubekela phambili lentuthuko eZansi yemaNdebeleni uHon Albert Nguluvhe ubikele umsakazo ukuba imali le izancedisa ukulwisa izidakamizwa kulesisigaba.
“Kulandela ukumemetheka kwezidakamizwa sathatha inyathelo lokuthi silwisane lezidakamizwa. Savula amaqembu amane, azakhangela: ukunciphisa imithambo ethengisela abantu izidakamizwa, ukwehlisa inani labathengayo, ukuncedisa kumbe ukulapha abahlaselwe yezidakamizwa lezi kanye lokuxhumanisa umphakathi lalabo abaphuma ezibhedlela akade bethatha izidakamizwa phambilini,” kubika uNguluvhe.
UNguluvhe uthe basebenzisa ithuba lokuthakazelela uzibuse ukuba bafinyele abantu abanengi. Bebafundisa ngengozi ezidalwa yezidakamizwa.
“Senelisa ukuqhuba imikhankaso etshiyeneyo sixoxa labantu ngobubi obudalwa yizidakamizwa kuntsha yethu. Senelisa ukuxoxa labantu abafika amakhulu amane eMatobo mhlaka 16 kusiya ku18 Mabasa. EBeitbridge senelisa ukwenza umkhankaso eLutumba, lapho esasifundisa abantu ngalezi zidakamizwa, saqeqetshisa abantu ukuba bancedise abantu emakhaya njalo benelise ukubahambisa ezibhedlela. Abanye abasila kuzidakamizwa bazahanjiswa eGuyu Youth Service ukuba befundiswe imisebenzi ezabathuthukisa,” kubika uNguluvhe.
INational Task Force ekhangele ngezidakamizwa yathembisa ukuba izakhipha imali engange USD$ 286 000 ukuthi kuyakhiwe kumbe kuvuselelwe izibhedlela zabantu laba(rehabilitation center). Okwakathesi iZansi yema Ndebeleni isiyenilise ukuqoqa i USD 24 000.
“Isikhwama sethu sile USD$ 24 000 le ZWG2 000 esikhangele ukuthi izancedisa ukulwisa lezi ,zidakamizwa. Sikhangele ukukuvuselela iOld TB Clinic eGwanda lokwakha iO.I Clinic ePlumtree. Emgceleni we Beitbridge kuleqembu elikhangele ngezidakamizwa ukuze abantu bengenelisi ukungena lazo kuleli,” kutsho uNguluvhe.
Abenkonzo, inkokheli zomdabu, uzulu, ingatsha ezizimele zodwa liyakhuthazwa ukuba lincedise kulumkhankaso.
