01 Ntulikazi 2024
Ngu Liberty Mutamba
Izakhamizi zeMkhalipe kwele Gwanda South zithi ukwendiswa kwabantwana kudalwa yindlala lezidakamizwa ezigcwele indawo yonke.
Isisekelo sombuso welizwe sithi umntwana ngumuntu oleminyaka engaphansi kwetshumi lasitshiya galombili (18yrs).
Izakhimizi zakulomango zibika ukuba indlala ihlasele uzulu wonke, bathi yiyo ebangela ukuba abantwana bayendiswe besase bancane.
UTumiso Malapela ohlala eNgoma Village uthi indaba yokwendiswa kwabantwana idalwa yikuba abazali bayabe beswela ngakho sebeyendisa abantwana ukuze bathole ukudla.
“Indaba yokwendiswa kwabantwana besese bancane ikhona iyaphila ezabelweni ikakhulu emhlubulweni wakithi. Ulakho ukuthola ukuthi abazali bayahlala phansi beyendise umntwana ngoba bebona kojaha kulenzuzo engcono. Umntwana ikusasa lakhe lihle litshabalale, konke lokhu kudalwa yindlala. Abantwana yebo balakho ukuthanda izinto kodwa isisusa sendaba yindlala.”
“Sinanzelela ukuthi umthetho uyavikela lokhu kodwa ezabelweni la indaba yendlala yiyo ehlupha uzulu. Ngabe uhulumende uyadinga isisombululo kundaba yendlala yikho into yokwendiswa kwabantwana ingayehla kwelakithi lapha,” kutsho uMalapela
Omama labo bakhathazwa yizidakamizwa esezibhahile abacabangela ukuba yizo ezifuqa okhekhe ukuze bangene emacansini besebancane. USithembiso Moyo uthi inhlonipho isisilela.
“Abantwana sebethatha impilo kalula njalo bafuna ukuba kwazi konke nje. Izidakamizwa sezithathwa langabo khekhe ikakhulu laba abasanda kuqeda isikolo lalaba abasanda kuqeda. Isiphetho kuvame ukuba yikuzithwala kwama nkazana, sekudala ukwendisana. Kubuhlungu njengomama ukubona isehlakalo lesi sisenzakala kodwa abantwana ikakhulu laba abathatha izidakamizwa bayasikhathaza,” kutsho u Moyo.
USithabile Ndlovu ohlala eJohnDip uthi usiko kumele luvuselelwe ukuze ingane ziphephe kudaba lokwendisana.
“Kumele sivuselele isiko lethu njengabantu abansundu. Thina besikwazi ukuthi kwenziwa imicimbi eminengi andubana umntwana ayende, manje abantwan balezinsuku bayaziyendisa njee. Indlela osekusenziwa ngayo isigwenxa lathi abazali abantwana sebezi busa,” kusitsho uNdlovu.
Inkokheli zomdabu zithi zisebenza kanzima ukuze abantwana bavikelwe kusehlakalo lesi. UChilangano Dube ongu Sobhuku kwele Mkhaliphe uthi uzafundisa abantu ukuba babone ububi bokwendiswa kwabantwana.
“Sizabiza abantu sibatshele ukuba asivikeleni ikusasa lethu. Ukwendiswa kwabantwana kubulala ikusasa, njalo abantwana balakho ukuhlukuluzwa emendweni ngoba ingqondo ziyabe zizincane. Sibonga uhulumende ngoku qinisa isandla emthethweni ozavikela ukwendiswa kwabantwana besase bancane,” kubika uSnr Sobhuku uDube.
Umsakazo kazulu ubuyethekelele izakhamuzi ze Mkhalipe ku ward20 usethula umthetho wokwendiswa kwabantwana ezabelweni. Umthetho usubopha wonke umuntu ophatheka kunkulumo yokwendisa umntwana oleminyaka engaphansi kwe 18, lowo muntu uthola isigwebo seminyaka emihlanu. Umthetho uthi akula muntu ovumela ukwenda loba ukwendiswa eleminyaka engaphansi kwe18 yrs.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemana@gmail.com.
Click the link below to join our WhatsApp Groups.
https://chat.whatsapp.com/G4uvr9rCkik8t7sFSBduKv
Come Advertise With Us.
