12 Mpandula 2024
Ngu Mpokiseng Sibanda.
GWANDA SOUTH- Abalimi bathwele amathumbu ngezandla ngenxa yokufelwa yizifuyo ezifana lembuzi lapho nxa zizala njalo zibuye zifelwe langamazinyane eziwazalayo kubangelwa yisomiso sokungani kuhle kwezulu esihlasele ilizwe lonke jikele (Elnino induced drought).
Ukuswelakala kwamanzi okunatha kanye lokudla okwenelayo kwezifuyo ilizwe lonke sekubangele ukukhathazeka kubalimi ngoba belahlekelwa yizifuyo ngezinga eliphezulu okuletha ukudana kwabanengi ngoba kuyilo ibhanga elibambe impilo zabo. Imbuzi ngezinye zezifuyo esezihlaselwe yindlala okwenza zife ngobunengi lapho zizala zibuye ziphunze.
USiphiwe Dube ongomunye wabalimi asebelahlekelwe zimbuzi kanye lamazinyane ngenkathi zizala uthe indlala inkulu kakhulu ezifuyweni.
“Zehluleka ukuzala kuhle imbuzi kulezi insuku kunanzelelwa ukuswelakala kokudla emadlelweni ngalesisikhathi sendlala ehlasela labantu. Indlala leyi ibangela ukuthi imbuzi ziphunze zehluleke ukukhipha ingqwatshi zicine zisifa kukanti ezinye lokuphenduka egangeni kazisenelinisi zehlulekela khonale zize zife zibonakale sezonakele,” kusitsho unkosazana Dube.
UTsekiso Ndlovu uthe egangeni akusahambeki ngenxa yengcuba.
“Phose iganga lonke ubizwa liphunga lembuzi kanye lokungamazinyane okufileyo abanikazi sebehambe badela ngoba lazo zihamba imango emide zidinga ukudla okungcono kodwa zikuswele ngoba kome ilizwe lonke zicine ziphela amandla zife,” kutsho umnunzana Ndlovu.
Ekhuluma lentatheli yomsakazo kazulu uSamson Ndlovu okhangela ngokondliwa kwezifuyo kugatsha lwe Veterinary Services uthe ukufa kwembuzi kanye lamazinyane kubangelwa yindlala.
“Ukufa kwembuzi kanye lamazinyane azo kwenziwa yikuswelakala kokudla okulomsoco ezifuyweni ukuze zenelise ukuncediseka emathubeni okuzala ngoba ziyabe zingela mandla,” kusitsho umnunzana Ndlovu.
Uqhubeke esithi izifuyo ezilamabele kumele zithole ukudla ukuze zingahlangani lobunzima lapho sekufanele zizale.
“Okungancedisa izifuyo yikuthi ziphiwe ukudla ikakhulu ezimithiyo kuthi lalapho nxa sezithe zehluleka ukuzala kuhle ingqwatshi ingaphumanga kufanele zithole iphilisi elibizwa ngolimi lokwebolekwa okuthiwa yi After Birth Foaming Pessary ukuze ligezise ingcekeza yonke eyabe ingahlukuluza isifuyo okungaba yimbangela yokuthi sife”.
UHulumende weZimbabwe uqhuba amalungiselelo okuthi ancedise abalimi ngokudla kwezifuyo ukuze zilondolozeke zingafi ziphele.
