24 Mfumfu 2024
Ngu Liberty Mutamba
Induna yase Dibilashaba kwele Gwanda South u(Oaheng Nare) Chief Marupi ekhotheme ngeSonto ephelileyo izafihlwa emzini wayo koMbuzimbili ngeSonto ezayo.
Induna ikhothamele esibhedlela se Healthpoint Hospital eHarare, ngemva kokugula isikhathi esifitshane.
Isikhulumeli somdeni uChris Marupi ubike ukuba umzimba wenduna uzahlolwa kulindwe impumela ye (kuPostmortem) andubana ufihlwe.
“Umzimba weNduna uzalandwa eHarare ngoLweSihlanu ntambama lapho esicabanga ukuthi siyabe sesilempumela ye postmortem. Ngaleyo ntambama umzimba uzasuka eHarare ufike edolobheni leGwanda ngo Mgqibelo ekuseni. Kuthi ntambama ubusuqonda ekhaya lapho induna ezafihlelwa khona. Njenge muli lesigaba sizizwa silahlekelwe kakhulu,” kusitsho uMarupi.
Usobhuku wesigaba njalo elilunga lomdeni uMolisa Nare uthi lokhu belothuli ngokukhothama kwenduna
“Ukukhothama kwenduna lokhu singakuzwisisi njengomdeni ngoba usuke engumuntu otshaywa likhanda kodwa eHarare besegijinyiswa yisisu. Lokhu kungasicaceli kuhle ukukhothama kwenduna, sizalinda impumela ye postmortem.
“Esigabeni lapha sidlela evalweni ngoba induna ibisanda kutshontshelwa imota
ngabantu akade behlome imibhobho, kukanti phambili usomabhizimusi eBuvuma bamdubula, babuya bangenela umuyi asibuquthi ubuthongo kulumango” kutsho uNare.
Ubabakazi kamuyi uAngelina Marupi-Moyo ugcizelele esithi ukukhothama kwenduna lokhu kungabacaceli.
“Ukusuka kwenduna lapha ekhaya asikuzwisisanga ngoba akuzange kwacaca, njalo thina besikwazi etshaywa likhanda nxa sekuthwa besehlanza segijinyiswa yisisu asisazwisisi..Kubuhlungu okusehleleyo. kusitsho uMoyo.
Osabambele isihlalo senduna yeGaranyemba uNhlamba uJefrey Ndlovu-Nhlamba uthi ukukhothama kwenduna kutshiye isikhala esikhulu esiqintini seGwanda.
“UMarupi bekulijaha ebelisakhula njalo lifundiseka. Ubengela cuku njalo ubezehlisa ebantwini. Ubeqinisa sibili imithetho yesintu Silahlekelwe kakhulu njenge Gwanda, sizamkhumbula,” kutsho uNdlovu-Nhlamba.
UHulumende uzancedisa ekufihlweni kwenduna uMarupi.
Induna ibisibuse iminyaka elitshumi lambili (12yrs).Ikhothame ileminyaka engu 28. Induna yathatha intonga yobukhosi kuyise uLawrence Nare njalo kuleyo ndlu besekusele yona kuphela.
Esiqintini seGwanda kulenduna eziyisithupha uMasuku, uMathema, Marupi, Kgwatalala, Nhlamba lo Mathe. UNhlamba lo Marupi bakhotheme.
uMarupi utshiye umkakhe uRorisang Tlou.-𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
