20 Zibandlela 2025
Ngu Liberty Mutamba
Umzimba webutho lesizwe uMajor Gen (Rtd) Solomon Siziba obhubhele enkambeni yamabutho iJosiah Magama Tongogara edolobheni le Harare udlule emzini wakibo eNhwali, evaleliswa yimuli, izihlobo labangane andubana ethwalelwe koBulawayo.
USiziba unikwe isicoco sokuba liqhawe lesizwe, (National Hero). Ubhubhe eleminyaka engu 67 ngemva kokugula isikhathi eside.
Umzimba ka Siziba usuke koBulawayo wadlula epulazini lakhe eTodds wasuthwalelwa eNhwali lapho adabuka khona, wasubiselwa njalo ko Bulawayo.
Umuyi uthe engena ekhaya izihlobo zahlengezela inyembezi, zitshengisa ukudabuka ngokulahlekelwa ngomunye wabo.Ubabakazi kamuyi uSarah Siziba ube duduza imuli ehaya umfowabo njalo encoma imisebenzi ayenzayo esaphila.
Isikhulumeli semuli uIsaac Siziba uthi umuyi bengubaba othanda ukulima .
“Silusizi njenge muli ukulahlekelwa ngumthunzi, ubaba, ibutho, umlimi obesebenza ngokuzimisela lokuzikhandla. Umuyi belothando kubobonke abantu besigaba lesi njalo ethanda ilizwe, waze wazinikela ukuya lwela ilizwe lakithi.”
“Sibonga uMongameli ngokunika umuyi isicoco lesi, loba sikhala njenge muli, kodwa uHulumende engenela kuba nganeno,” kutsho uSiziba.
Izikhulumi zitshengise ukuba uSiziba ubeyindoda esebenza ngokuzikhandla njalo elobuntu.
Omele abantu beGwanda South Constituency edale lephalamende njalo engumsekeli kaMinister obona ngokwethulwa kwemibiko, uHon Dr Omphile Marupi uthe isizwe silahlekelwe kakhulu.
“USiziba ubeyindoda elesibindi eyanikela ngobutsha bayo, yabona kungcono ukuthi ilwise umbuso wamakhiwa. Namuhla siyaziqhenya ngemisebenzi kaSiziba. Wayeliqhawe elilobuntu, elilesizotha njalo isibindi sakhe sizasala sisi khumbula. Sikhala lemuli yako Major Gen Siziba, Sithi iqhawe lethu, kalilale ngokuthula,” kusitsho uDr Marupi.
Umqondisi wezenthuthuko lengqubekela phambili kwele zansi yemaNdebeleni uHon Dr Evelyn Ndlovu njalo enguChief Mourner ko Siziba uthe iqhawe belingumuntu othanda isizwe.
“USiziba waqala isibutho esase mncane njalo wasebenza ngokuzikhandla lange nhlonipho. Utshengise njalo ukuthi uthanda ilizwe lakhe, namhla silenkululeko ngenjongo yebutho lethu eselithule. Ubengumuntu olesineke njalo eqakathekisa isigaba sakibo.
UMongameli welizwe umnike isicoco sokuba liqhawe lesizwe ngoba imisebenzi yakhe ibizikhulumela. Sithi lala ngokuthula Major Gen (Rtd) Siziba,” kutsho uDr Ndlovu.
USiziba wafunda e Nhwali Primary wasesiya eManama High lapho athathwa khona, esiya lwela uzibuse.
Umzimba kaSiziba uthwalwe yindizamtshina yamabutho wabuyela ko Bulawayo. Utshiye abantwana ababili. Ilanga lokubekwa kuka Siziba alikamenyezelwa.
