27 Mbimbitho 2025
Ngu Artwell Sihwa
SELONGA-Izakhamizi zeSelonga zimadolonzima ngemva kokuba ingwenya ihlasele yabulala umama obethiya inhlanzi zesitshebo edamu leSelonga ngeSonto.
UNkosikazi Shella Nyoni oleminyaka yokuzalwa engaphezulu kwamatshumi amahlanu ohlala koMbuzimbili uhle wabhubha ngemva kokuhlaselwa yilingwenya.
Abanye abakade bethiya inhlanzi bathi umuyi ebetshone egola inhlanzi ezihlalele ndawonye wasesuka esiyazama kweyinye indawo lapho afike wahlaselwa khona yingwenya.
Kubikwa ingwenya ithutshe ngemva kwakhe yamuwisela emanzini yamdonsela phansi.
UMnu. Andrew Moyo uthi sibethusile lesisehlakalo
“Umama ebehleli ngaphetsheya imini yonke, wonela ukusukuma esiya kweyinye indawo, sezwa esehlaba umkhosi , sisukume sigijima safika isimdonsele lapho okulamanzi amanengi khona. Saqonga izibindi ukuze siyenelise ukuyafika lapho abekhona, sathwala izigodo sangena sitshaya amanzi abanye bejikijela , ngebhadi elikhulu sathola esethule njalo ephuke isadla , elimele unyawo, isisu kanye lasebeleni okuhle kwasixegisa amadolo,” kubika uMoyo.
Omunye walabo ababone lesisehlakalo nguNkosikazi Monica Dube.
“Mina ngokwami angikabi lesiqiniseko sokuthi okunje kwenzakale emehlweni ami. Ngijayele ukuzwa ngabathi lamhla ubungozi bengwenya ngibubone ngawami womabili, angila mandla okukhuluma okwamanje inqondo yami ididekile”, kutsho umaDube.
USephukile Ncube ongomunye wabaqonge izibindi bayalanda umuyi, ukhuluma lomsakazo.
“Thina sibonga uNkulunkulu osiphe isibindi sayangena emanzini afika emahlombe ukuze senelise ukukhupha umufi emanzini, akuzange kube lula kodwa sikwenze kwenzeka ngoba ibizamudla imqede.”
Ushella Ncube obengomunye ojayele ukugola inhlanzi lomufi uthi ulahlekelwe ngumngane njalo ukhuthaza uzulu ukuthi ananzelele edamu.
“Mina ngiphakathi kobuhlungu obukhulu, umama besiziphilela kuhle edamu lamhla sesitshiya kabuhlungu. Asiyekeleni ukuba sedamu ngoba impilo ayithengwa, siphila ngokulima edamu lokuthiya khonokhu kodwa lokhu kusethuse kakhulu”, 14 kutsho umaNcube.
Inengi lezakhamizi liphakathi kwendlala embi eyadalwa yisomiso sanyakenye osekutshiye inengi seliphila ngokuthiya ukuze lithole isitshebo, okucatshangelwa ukuthi ingwenya zasuka edamu leMakapakapa ngemva kokutsha kwalelidamu zayangena kweleSelonga.
