22 Mabasa 2026
Ngu Liberty Mutamba
Sekufakwe imitshina yamasayisayi, kwagcotshwa(pendwa) imiduli, kwafakwa lemitshina ezenelisa ukucubungula amaphasipoti ngobulembu konke lokhu yingqubekela phambili esiyenzwe emngceleni weMphoengs eMangwe ozenza ukusebenza kwalumngcele uthuthuke.
IMphoengs esesiqintini seMangwe ngeyinye yemingcele eseZansi yemaNdebeleni. Ukuvuselelwa kwayo kuzenza impahla, izimota zikwanise ukudlula kuhle njalo kuqinise ubudlelwano phakathi kwelizwe leBotswana leleZimbabwe.
Intuthuko le eye USD40, 000 iyenziwe nguHulumende ebambisane lengatsha ezizimele zodwa.
Ukuvulwa kwe Online Border Management System kuzenza umsebenzi uyenziwe ngokuphangisa njalo labo abahlose ukudlula okungekho emthethweni bengenelisi.
“Ngesikhathi sekhefu bekuvame ukuba lodwendwe lapha emngceleni ngoba umsebenzi ubusiba mnengi, namhla sekufakwe imitshina yokwenza ukuba umsebenzi ubelula njalo asithathi isikhathi lapha nxaa kumele siyekwele Botswana,” kubika uNozithelo Ndlovu.
IOnline Border Management System ivulwe ngokusemthethweni ngu Hon Chido Sanyatwe ongumsekeli kaMinister we Home and Cultural Affairs oqinisekise ukuba uHulumende uzasebenza gadalala ukuba umngcele weMphoengs uthuthuke.
“Lokhu kutshengisa ukuba uHulumende uzimisele ukuphakamisa umngcele lo, lezinye indawo ebezisalele emuva phambilini. IOnline Border Management system le iyasebenza ngokugcweleyo lokhu sekuzaphamisa umngcele lo. Amaburglar, amafasitela amahofisi lawo asesezingeni eliphezulu. Umsebenzi lo we USD40, 000 utshengisa ukuba uMongameli uzimisele ukuphakamisa izinto zonke jikelele kungabi lesigaba esisalelela emuva. Ukubambisana kwengatsha ezizimele zodwa loHulumende siyakubona kuletha ingqubekela phambili ezigabeni,ā Kutsho uHon Sanyatwe.
Induna uTjaNgulube ubonge ingqubukela phambili eyenziwe eMphoengs.
“Lokhu kuhle okwenzakala lapha siyabonga ukubona umngcele wethu uthuthuka ngendlela enje. Sifisa uhulumende anikeze abantu abadala ithuba lokuba benelise ukudlula lapha ngezithupha nxa besiya kweleBotswana ikakhulu nxa behambela izimfa. Kulezihlobo zethu ezinengi ezihlala eBotswana njalo kubanzima ukudlula ikakhulu oKhulu laboGogo abangela maphasipoti,” kubika induna uTjaNgulube.
Iziphathamandla, abasebenza kugatsha lwe Home Affairs bebethe gwaqa eMphoengs kuqhutshwa loluhlelo.
