Health Desk
Ngu Liberty Mutamba
UMsekeli kaMongameli uCol (Rtd) Dr Kembo D Mohadi sevule ngokusemthethweni umtholampilo osebangeni eliphansi (kilinika) entsha edolobheni le Gwanda. Lumtholampilo ubizwa ngokuthi yiJoshua Mqabuko Nkomo njalo ukhangelele ukwelapha abantu abadala, abakhubazekileyo kanye labalweli benkululeko mahala.
Ubaba uNkomo wasebenza ngokuzikhandla ukuze ilizwe leli lithole uzibuse, ngemva kokuthola uzibuse uDr Nkomo wasebenza njalo ngobunono ukuthuthukisa ilizwe.
Imisebenzi yakhe emihle ayizange ibeyize nanko sekuyakhwe umtholampilo ozabayisikhumbulo kuBaba njalo inceda abadala abakhubazekileyo kungela ndleko.
UMsekeli kaMongameli uMohadi ubike ukuba lumtholampilo uzancedisa ukuphungula imango ehanjwa ngabantu abadala bedinga usizo kwezempilakahle.
“Umtholampilo lo uzancedisa abantu abadala ikakhulu abahamba umango bedinga usizo kwezempilakahle. Ingqubekelaphambili le iyisikhumbuzo yemisebenzi eyenziwa nguBaba wethu ngesikhathi sempi, ingakho inikwe ibizo lakhe. Leyi yindawo yomuntu wonke jikelele ngoba sihamba ngaphansi kwamazwi athi akula ndawo okumele isale ngaphandle iloba umuntu okumele asalele emuva.
“UHulumende uzimisele ukwakha lokuthuthukisa izibhedlela ukuze abantu bethole ukuncediseka ngendleko ephansi. Lapha abantu abakhubazekileyo labadala bazalatshwa mahala,” kubika uVP Mohadi.
Umtholampilo lo uyakhwe nguHulumende exhasane losomabhizimuzi uJimayi Muduvuri obike ukuba unikeza ukubonga kuHulumende ngokwakha lesisakhiwo njalo ebonga imisebenzi eqhutshwa nguHulumende kundawo zonke.
“Ngiqhuba ingqubekela phambili le ngoba kuyindlela yami yokubonga uMongameli uDr Emmerson Mnangagwa loHulumende ngokuqhuba imisebenzi emihle elizweni lethu. Ngomnyaka ka 2005 ngaba sengozini eyangitshiya ngikhubazekile ngokunjalo uMongameli wangincedisa kakhulu ukuze ngiphole okweminyaka edlula itshumi ngingena ngiphuma ezibhedlela ngaze ngaphola. Ukwakha lumtholampilo kuyindlela yokumbonga.
“Ukuhlala kwami emtholampilo kwanginika uthando kwezempilakahle ingakho ngihamba ngisakha lezizakhiwo. Selokhu ngasungula ingqubekela phambili sengenelise ukwakha imtholampilo ekuzinga eliphansi emithathu njalo ngihlose ukuthi aqhubekele phambili esanda elizweni lakithi. Nginika ingqobe kubadala besigaba, izinduna ukuba sisebenzisane kuhle bakithi ukuze sithuthukise indawo yakithi,” kubika uMuduvuri.
Abalweli benkululeko sebeyemukele isakhiwo lesi ngezandla zombili nangu uMary Mpofu.
“Sibonga uMongameli ngikusikhumbula thina esavika inhlamvu ngesikhathi sidinga iZimbabwe namhla sesithole indawo yokupholisa amanxeba ethu mahala. Lokhukutshengisa ukuthi iyasikhumbula njalo uyawuqakathisa umsebenzi esawenza egangeni sidinga iZimbabwe,” kubika uMpofu.
