Sports and Culture Desks
Ngu Liberty Mutamba
GWANDA- Abalandeli benguqu edolobheni le Gwanda balesizatho sokuthakazelela ilanga labaNsundu nanko phela amaqembu abo eletha ukubambana, ukuhloniphana, lokusebenzisana ndawonye.
Namhla abantu bathakazelela amasiko, ubuntu babo, ulimi, ukubambana kanye lokudla kwabaNsundu. Phambilini bekuvame ukuphekwa utshwala besintu abantu bezikholisele, ngokutshintsha lokuhamba kwesikhathi abantu sebehlanganiswa yimicimbi ethile.
EGwanda inguqu yiwo umthimba ohamba phambili ngokubuthanisa uzulu. Ukuvuthelwa kwe mpembe, ukuhlabelela enkundleni sekulisiko labandeli benguqu.
IGwanda ilamaqembu amahlanu agijjima kuDivision One, ZRP Gwanda, Blanket, Superstrikers, West Nicholson le Gwanda Pirates. Yizo ezenza iGwanda iphakame kwezenguqu.
Ngemva kokusungulwa kwamaqembu amabili iSuperstrikers le Gwanda Pirates kwabalomfutho eGwanda kweze nguqu nanko abantu besekela amaqembu la ngendlela ephezulu. Sekuyinhlalayenza ukuba ngempelaviki abantu bahlangane enkundleni ye Phelandaba besekela amaqembu abo lawa.
“Kimi ibhola sekulisiko, iqembu leli leSuper strikers selanginika ikhaya elitsha lapho engihlangana khona labangane, izihlobo sikholise. Ibhola lenza sibemunye loba singasekela amaqembu atshiyeneyo kodwa siyabe sihlanganiswa libhola okwenza sihlale sibambene.
“Iqembu leSuper strikers selivule ithuba kubafana beGwanda lokuthi batshengise iziphiwo zabo. Ubuntu bethu sebasilahlekela kwezinye indawo kodwa enkundleni lokhu sibambene,” kubika uMkhulisi Nkisto Nkiwane umlandeli we Superstrikers.
Ibhola alikhethi mhlobo alikhethi mbala, liyakwanisa ukusibambanisa loba sivela kundawo ezitshiyeneyo. Singasekela amaqembu atshiyeneyo okungenza singaboni ngasolinye kodwa inguqu isifundisa ukwethemba, ukuziqhenya, imbeko, ukubekezela, ukuzigqaja lokhu kuveza ubuNsundu bethu,” kubika u Admire Ndlovu, unobhala we Superstrikers FC.
Ukubona inkundla ye Phelandaba iphithizela kuyabe kudlala amaqembu laa asezakhele udumo njalo enelisa ukubambanisa abantu. UNokuthula Amic Ndlovu uthi iGwanda Pirates iletha ukujabula lokubambana eGwanda.
“Ibhola liletha ukujabula njalo ligqugquzela ubuntu bethu. Imideni isihlangana nxa kulezimfa kuphela, isiko alisafani lakudala kodwa inguqu lokhu iletha abantu ndawonye. Kuhlatshelelwa abantu bethokoza. Inguqu lisiko esalitshiyelwa ngabokhokho esilokhu silibambe ngezandla zombili. Iqembu lelo selasinika ikhaya lokuthi sijabule sonke ndawonye singamajahunda,” kubika uNdlovu
“Ungaphuma edolobheni le Gwanda ugqoke impahla ze Gwanda Pirates abantu bahle babone ukuthi uvela ngaphi, iqembu leli selisinike uphawu kwezenguqu sesenelisa ukuziqhenya ngalo.
“Ngokusungulwa kweqembu leli sekwenza abantu begcwale enkundleni yePhelandaba okutshengisa ukubambana ukuthandana okuzwisisana. Sesingakhuluma amazwi angaqondile nxa singqikilana labomamkhelwane okwemizuzu yoneyo embalwa kodwa umdlalo ungaphela sibamunye. Ubungane obunye sebudalwe khonapha enkundleni le.
Uma sithokozela ilanga labaNsundu siyabona ukuba inguqu iyasihlanganisa njalo sekulisiko lethu. Abatsha abadala omama labo baba bathola ikhaya kuthi abalesiphiwo kwezenguqu labo sebesenelisa ukuligiqa khonapha eGwanda,” kubika uKhayelihle Cele.
Ilanga labaNsundu lithakazelelwa izwekazi lonke lapho abantu abayabe begiya ngobuNsundu bevuselela amasiko, kudliwa ukudla kwesintu abantu bendawonye.
Abantu be Zansi yema Ndebeleni bazitema ngokuthi bangumcilo wamakhosikazi. Nanko bekhuluma ngendimi ezitshiyeneyo kulumhlubulo.
Lonyaka ilanga leli lithakazelelwa ngaphansi kwendikimba ethi “Assuring Sustainable Water Availability and Safe Sanitation System to Achive the Goals of Agenda 2063.”
