17 Mabasa 2026
Ngu Reaboka J Nare
GUNGWE Abasakhulayo abeWard 12 sebekhangelele ukugola inhlanzi zabo edamu leGungwe.Inhlanzi lezi bazinikezwa lugatsha lwabasakhulayo iMinistry of Youth and Empowerment nyakenye ngemva kokuvulwa kwalelidamu. Idamu leli livuselelwa emveni kokudilizwa lizulu eminyakeni edlule
Abatsha bakhangelele ukuqala ukugola inhlanzi ngenyaka ezayo,
Ekhuluma lentatheli yomsakazo kazulu umgcinisihlalo wali project yenhlanzi elamalumga angu48 uHlanganani Ndebele osuka eMalitou ubike ukuba balethemba ukuthi loluhlelo luzaphumelela luphathise intsha.
“Silombono lethemba ukuthi loluhlelo luzaphathisa abasakhulayo emangweni wakithi, sikhangele ukuthi imizi yonke ekuward 12 ukuthi ithole inhlanzi njalo babe lalapho okugcinelwa kumbe okufuyelwa inhlanzi (fish ponds) endaweni zabo,” kubika uNdebele.
Ukhansila ka ward 12 u Brain Nyathi uthi intsha izathuthuka njalo incedakale ngaloluhlelo lwenhlanzi.
“Silethemba ukuthi sezikhona inhlanzi njalo abatsha bazancedakala ngaloluhlelo, ngoba bonke abasakhulayo kumele basizakale, lalabo abangekho kulelonani elikhona okwakathesi kodwa kumele liqhele ukuze wonke osakhulayo aphathiseke nxa sebegolile bathengisa inhlanzi.
“Kukanti sikhangelele ukuthi bayenze njalo ezinye inhlelo ezibancedisayo empilweni kusuka kuloluhlelo lokufuya inhlanzi. Ukufuya inkukhu, imbuzi loba ingulube njalo kumele igoqele izigaba zonke ezikuWard 12,” kubika uClr Nyathi.
Omunye wabasakhulayo ohlala eNtswangu uPhilisia Nare uthe bakhangelele ukuthi loluhlelo lubaphathisa.
“Njengetsha, loluhlelo siyalwamukela kakhulu njalo sesikhangelele ukuthi singagola inhlanzi sithengise, ngemva kwaleyo nzuzo sesisungula ezinye inhlelo emakhaya, amabhizimusi amancane okusincedisa lapho esihlala khona sizimele njengetsha.
“Kodwa lokhu siyabe sikhangelele ukuthi sihlangene siyabe sibambisana njengetsha kuhlelo lokufuya inhlanzi yikho singathole ingxenye yethu ngemva kokuthengisa sesisungula okunye sizimele kodwa silokhu singamalunga kuhlelo lwenhlanzi,” kutsho uNare.
Idamu leGungwe lavuselelwa yiGwanda Share Ownership Trust
