Umsekeli kaMongameli welizwe leZimbabwe, u Col (Rtd) Dr Kembo Mohadi, ukhokhele kumcimbi we-K.C.D. Mohadi Sports Tournament eqhutshelwe eMaphisa esigabeni seMatabeleland South ngempelaviki.

Ekhuluma kulumcimbi, uMsekeli kaMongameli uDr Mohadi ukhuthaze abatsha ukuthi behlukane lokusebenzisa izidakamizwa kanye lokunye okudakayo, bakhethe ezemidlalo njengendlela enhle yokuthuthukisa iziphiwo zabo.

Ugcizelele ukuqakatheka kwezemidlalo ekuthuthukiseni abatsha, wakhuthaza ukubambana lokusebenzela ndawonye ekuthuthukiseni kwelizwe.
Umncintiswano lo, uqhubeka unikeza abatsha ithuba lokutshengisa iziphiwo zabo ezingeni eliphezulu.
Emidlalweni yokuncintisana yamaConstituency ali tshumi lambili (12), iMatobo-Mangwe Constituency ithole isicoco kubhola likanobhutshuzwayo elidlalwe ngabafana kwathi iBeitbridge East Constituency yona yathatha isicoco kubhola lokuqhaga elidlalwe ngamankazana.
Ngu Princess Mahlangu

