17 Mabasa 2025
Ngu Liberty Mutamba
Lonyaka kuzabe kuqala ngqa, ukuba ilanga likazibuse linanzwe esiqintini seGwanda; isiqinti lesi sesikhethe ukuba umdlalo lo uzaqhutshwa eHalisupi Primary ward-19 kwele Gwanda South.
Umdlalo lo uthakazelelwa mhlaka 18 Mabasa minyaka yonke. Abantu bayabe bebhiyoza uzibuse owatholwa ngo1980, ngemva kokucitheka kwegazi kulwelwa inkululeko.
Umdlalo we Province wona uzaqhutshwa esiqintini seMangwe, ePlumtree High School.
Usikomitshi wesiqinti seGwanda uNomathemba Ndlovu uthi amalungiselelo welanga leli aqhutshwa ngendlela.
“Lonyaka sizathakazelela ilanga lika zibuse eHalisupi Primary kuyabe kuqala ngqa ukuthi ilanga leli silithokozele njengesiqinti sizimele, livame ukuthakazelelwa edolobheni. Njenge siqinti sithembisa uzulu ukuba kuyabe kulilanga elikhulu, kuyabe kugidwa, kulembukiso, lokunye okutshiyeneyo.
“Ingatsha zikaHulumende lengatsha ezizimele zodwa zisukumele phezulu zisixhasa ukuba ilanga leli lihambe kuhle.
Kuzabe kungabizwa ozwayo eHalisupi uzulu wonke uyanxuswa,” kubika uNdlovu.
Umdlalo omkhulu welizwe uzaqhutshwa eGokwe, lapho uMongameli welizwe u Emmerson Mnangagwa azethula khona amazwi akhe.
Indikimba yalonyaka ithi ‘Devolve and Develop Together Towards Vision 2030.’ Zim@45.
Ilanga leli lizaqhutshwa kanye kanye lekhefu le Phasika, ngokunjalo amapholisa axwayisa uzulu ukuba batshayele ngonanzelelo.
